Madýro Tramppen kelissóz júrgizýge daıyn ekenin málimdedi

ASTANA. KAZINFORM — Venesýela prezıdenti Nıkolas Madýro Vashıngtonmen esirtkiniń zańsyz aınalymyna qarsy kúres boıynsha kelissóz júrgizýge daıyn ekenin málimdedi, dep habarlaıdy Kazinform menshikti tilshisi. 

Degenmen Madýro AQSh-tyń Venesýela aılaǵyna jasaǵan shabýylyna qatysty túsinikteme bermeıtinin kesip aıtty.

— AQSh úkimeti biledi, óıtkeni biz bul týraly olardyń kóptegen ókilimen sóılestik, eger olar esirtkiniń zańsyz aınalymyna kúres týraly kelisimdi baıypty talqylaǵysy kelse, biz daıynbyz, — dedi Nıkolas Madýro beısenbi kúni teleSUR memlekettik telearnasyna bergen suhbatynda. 

Venesýela prezıdenti ıspandyq tilshi Ignasıo Ramonamen keń kólemdi suhbaty kezinde ótken aıda Venesýela jaǵalaýy aılaǵyna jasalǵan qurlyqtaǵy shabýylǵa qatysty pikir bildirýden bas tartty. Keıbir BAQ ony TsRÝ jasady dep habarlady, dep jazdy NBC News. 

Madýro Karakas pen Vashıngton arasynda esirtkiniń zańsyz tasymaly men eldiń mol munaı qoryna qatysty máselede yntymaqtastyq múmkin ekenin atap ótti.

— Eger olarǵa munaı qajet bolsa, Venesýela Chevron jaǵdaıyndaǵydaı AQSh ınvestıtsııalaryn qashan, qaı jerde jáne qalaı qajet bolsa da qabyldaýǵa daıyn, — dedi Venesýela kóshbasshysy. 

Venesýela prezıdenti eki el arasyndaǵy beıbitshilik pen dostyq qarym-qatynasty qalaıtynyn habarlady.

Madýro bul áńgimede AQSh-taǵy áriptesine Qurama Shtattar halqy bizdiń dostyq, beıbit halqymyz jáne olardyń dostyq úkimeti bar ekenin bilýi kerek. Bizdiń uranymyz óte aıqyn: Soǵysqa jol joq, beıbitshilikke jol bar, — dep habarlaıdy teleSUR.

Osyǵan deıin AQSh prezıdenti Donald Tramp Ortalyq barlaý basqarmasyna Venesýelada jasyryn operatsııa júrgizýge ruqsat bergenin habarlaǵan edik. 

Keıin Tramp Amerıka Qurama Shtattary Venesýeladaǵy kemelerge esirtki tıelip jatyr dep sanalǵan aılaqqa soqqy jasaǵanyn málimdedi.