Madýro resmı túrde Venesýela prezıdenti bolyp jarııalandy

Endi ol 2019 jylǵa deıin memlekettiń basy-qasynda bolmaq. Bul týraly Reseı Jańalyqtar agenttigi habarlap otyr.

Basqarýshy kúshterdiń kandıdaty saılaýshylardyń 50,75 paıyz daýysyna ıe boldy, al onyń qarsylasy oppozıtsıoner Enrıke Kaprıles 48,49 paıyz jınady. Kaprıles óziniń jeńilgenin moıyndamady jáne saılaýdyń qorytyndysyn qaıta esepteýdi talap etti. Ulttyq saılaý keńesiniń basshysy Tıbısaı Lýsena oppozıtsııany halyqtyń tańdaýyn jáne demokratııany qurmetteýge shaqyrdy. «Venesýela demokratııa boıynsha - chempıon», - dep málim etti ol.

Saılaýdyń qorytyndysy resmı túrde jarııalanǵan soń, seısenbige qaraǵan túni el astanasy Karakasta sherýshiler men tártip saqshylarynyń qaqtyǵysy oryn aldy. Polıtseıler kózdi jasaýratatyn gazdy qoldanýǵa májbúr boldy.

50 jastaǵy Madýro saılaýǵa Chavestiń mırasqory retinde qatysty. Saıasatqa aralasqanǵa deıin ol Karakastaǵy metro júıesinde ter tókken. Madýro Chavespen tanysqan soń, joǵary bilimi bolmasa da, Venesýelada birqatar mańyzdy memlekettik qyzmetterdi arqalady. Chaves 2012 jyldyń jeltoqsanynda hırýrgııalyq ota jasaý úshin Kýbaǵa jasaǵan sapary barysynda Venesýela azamattaryn Madýroǵa daýys berýge shaqyrdy.

Eske sala keteıik, Venesýela prezıdenti Chaves 2013 jyly 6 sáýirge qaraǵan túni kóz jumdy. Ol 2011 jyldyń ortasynda anyqtalǵan isik dertimen eki jylǵa jýyq kúresti.