Madýro men jubaıy AQSh-ta 50 jylǵa deıin túrmege qamalýy múmkin
ASTANA. KAZINFORM — Beısenbi kúni AQSh prokýrorlary Venesýelanyń burynǵy prezıdenti Nıkolas Madýro men jubaıy Sılııa Florestiń saıası qarsylastar men AQSh azamattaryn azaptaýǵa qatysy bar degen jańa aıyp taqty. Bul negiz erli-zaıyptylarǵa buǵan deıin taǵylǵan esirtki saýdasyna qatysty aıyptardy tolyqtyrady, dep habarlaıdy Reuters.
63 jastaǵy Madýro men 69 jastaǵy Flores 3 qańtarda Donald Tramptyń buıryǵymen AQSh-tyń áskerı operatsııasy kezinde Karakastaǵy úılerinde ustalyp, esirtki saqtady degen aıyppen Nıý-Iorkke jetkizildi. Sodan beri olar Brýklındegi tergeý ızolıatorynda qamaýda otyr.
Beısenbi kúni Manhettendegi federaldyq sotqa qosymsha aıyptaý qorytyndysy usynyldy. Onda Madýro men Floreske toǵyz adamdy, sonyń ishinde AQSh-tyń úsh azamatyn azaptady degen aıyp taǵylǵan.
Aıyptaý qorytyndysynda 1999-2025 jyldary Venesýelada myńdaǵan adam memlekettik organdar tarapynan qýdalanyp, qamaýǵa alynǵany, azaptalyp, óltirilgeni aıtylǵan. Madýro 2013 jyly prezıdent bolyp saılanǵanǵa deıin ózi de, jubaıy Sılııa Flores te onyń aldyndaǵy prezıdent Ýgo Chavestiń úkimetinde túrli qyzmet atqarǵan.
Prokýrorlardyń málimetinshe, keıbir ustalǵandar elektr togymen azaptalyp, soqqyǵa jyǵylǵan jáne olardyń qol-aıaǵyn baılap, asyp qoıǵan.
Taǵylǵan barlyq aıyp boıynsha kinási dáleldense, Madýro men jubaıy 50 jylǵa deıin túrmege qamalýy múmkin.
Madýro men Flores ózderine taǵylǵan aıyptardy joqqa shyǵaryp, 2027 jylǵy 1 maýsymda Nıý-Iorkte bolatyn sotta óz ustanymdaryn qorǵaýdy kózdep otyr.
Buǵan deıin Sılııa Florestiń advokattary ony úıqamaqqa aýystyrý týraly ótinish berýdi josparlap otyrǵanyn málimdegen edi.
Advokattarynyń aıtýynsha, Brýklındegi tergeý ızolıatorynda qamaýda otyrǵan Sılııa Flores 11 keli salmaq tastaǵan. Dárigerler oǵan júregine ota jasalýy múmkin ekenin eskertken. Sondaı-aq olar Florestiń únemi basy aınalyp, álsirep, tynysy tarylyp júrgenin, shildede júrek talmasyna ushyraýy da múmkin ekenin málimdedi.
Alaıda beısenbi kúni sot Floresti qamaýdan bosatyp, úıqamaqqa aýystyrý týraly ótinishin qanaǵattandyrmady.
— Florestiń jaǵdaıy 5 qańtarda sotta alǵash kórgen kezimdegiden nashar emes, tipti densaýlyǵy sál de bolsa jaqsarǵandaı kórinedi, – dedi sýdıa.
Buǵan deıin Karakasta Madýronyń jaqtastary ony elge qaıtarýdy talap etkeni habarlanǵan bolatyn.
