Madýro AQSh-tyń yqtımal shabýylyna daıyndyqty kúsheıtti

ASTANA. KAZINFORM — Venesýela prezıdenti Nıkolas Madýro AQSh tarapynan múmkin bolatyn shabýylǵa daıyn bolý úshin Áýe kúshterine tıisti buıryq berdi, dep jazady Anadoly.

Ulttyq BAQ habarlamalaryna sáıkes, Madýro el astanasy Karakasta ótken Bolıvarıalyq áýe kúshteriniń 105 jyldyq mereıtoıyna arnalǵan saltanatty sharalarǵa qatysyp, AQSh tarapynan elge tónip kele jatqan qaýip-qaterlerge qarsy áreketke kóshti.

Madýro Áýe kúshterine «saq bolyp, tapsyrmalardy oryndaýǵa daıyn bolý» týraly buıryq bergenin aıtty, sebebi Venesýelaǵa shabýyl jasalýy yqtımal.

Madýro shamamen 17 apta boıy ártúrli qaýip-qaterlerge ushyrap kele jatqanyn atap ótti.

— Imperıalıstik sheteldik kúshter (AQSh) Karıb teńizinde, Ońtústik Amerıkada jáne Venesýelada beıbitshilikke únemi qaýip tóndirip otyr. Olar jalǵan ári asyra siltelgen dálelder keltiredi, biraq oǵan eshqandaı amerıkalyq qoǵam, álemdik qaýymdastyq nemese myqty venesýela halqy senbeıdi, — dedi ol.

Venesýela basshysy el óziniń jolynan taımaı, namys pen táýelsizdigin qurban etpeı kele jatqanyn alǵa tartty. 

— Búginde Venesýelada halqymyzdy qorqytatyn eshqandaı qaýip nemese agressııa joq. Bul halyq Bolıvardyń basshylyǵymen óz otanyn, jerin, teńizderin, aspanyn jáne tarıhyn qorǵaýǵa sabyrly túrde daıyndalyp jatyr, — dedi Madýro.

AQSh-tyń Cartel de los Soles uıymyna qatysty sheshimi

AQSh Madýro men joǵary laýazymdy venesýelalyq sheneýnikter basqaratyn qylmystyq uıym Cartel de los Soles-ty sheteldik terrorıstik uıymdar (FTO) tizimine engizdi.

Venesýela Cartel de los Soles uıymynyń bar ekenin moıyndamaıdy jáne AQSh-tyń bul sheshimin eldiń ishki isine aralasý úshin syltaý jasaý áreketi dep baǵalady.

AQSh «Esirtki trafıgimen kúres» jeleýimen jibergen álemdegi eń iri USS Gerald R. Ford ushaq tasyǵysh kemesi jáne soqqy jasaýshy top Latyn Amerıkasyna jetti.

Oǵan jaýap retinde Venesýela prezıdenti Madýro elde 4,5 mıllıon erikti qorǵaýshyny mobılızatsııalaǵanyn jáne kez kelgen shabýylǵa daıyn ekenin jarııalady.

Budan buryn AQSh Venesýela prezıdentin lańkestik uıymnyń kóshbasshysy dep sanaıtynyn jazǵan edik.

Sonymen qatar Tramp Venesýelada qurlyqtaǵy áskerı operatsııanyń júrgizilý múmkindigin joqqa shyǵarmady.

Venesýelanyń Qazaqstandaǵy Tótenshe jáne Ókiletti elshisi Rosalba Lo Býe Antıko Kazinform agenttigine eksklıýzıvti suhbat berip, AQSh shabýyldaǵan qaıyqtardyń esirtki kartelderine qatysy joq ekenin aıtqan edi.