Madrıdte ondaǵan myń adam Ispanııa úkimetiniń otstavkaǵa ketýin talap etti

ASTANA. KAZINFORM – Demonstratsııaǵa qatysýshylar premer-mınıstr Pedro Sanchestiń solshyl úkimetin sybaılas jemqorlyq jasady dep aıyptady, dep habarlaıdy DW.

Oppozıtsııa jetekshisi Alberto Nýnes Feıhoonyń konservatıvti Halyq partııasy narazylyq bildirýge shaqyrdy. Mıtıng Ispanııa astanasynyń ortalyǵynda ótti.

Eldiń ІІM málimeti boıynsha, oǵan 40 myńǵa jýyq adam qatysty, degenmen konservatorlar qatysýshylardyń eki ese kóp ekenin málimdedi.

Dál osyndaı kólemdegi Sancheske qarsy sońǵy mıtıng maýsym aıynda Madrıdte ótken bolatyn.

Narazylyq úsh kún buryn koronavırýs pandemııasy bastalǵan kezde qorǵanys maskalaryn satyp alýǵa baılanysty burynǵy Kólik mınıstri Sanches Abalos pen onyń burynǵy keńesshisi Koldo Garsııaǵa qarsy taǵylǵan sybaılas jemqorlyq aıyptaýyna baılanysty týyndady. 2020 jyldyń kókteminde Ispanııanyń úkimettik mekemeleri densaýlyq saqtaý salasynda tájirıbesi joq kompanııadan memlekettik tendersiz birneshe mıllıon maskaǵa tapsyrys berdi.

Der Spiegel jýrnalynyń málimeti boıynsha, kompanııanyń negizin qalaýshy keıinirek sotta Abalosqa, Garsııaǵa jáne basqa da laýazymdy tulǵalarǵa «birneshe júz myń eýro» para bergenin aıtty.

Ispanııadaǵy kelesi saılaý 2027 jyldyń ekinshi jartysyna ǵana josparlanǵan. Konservatıvti oppozıtsııa Sanches úkimetin otstavkaǵa ketýge jáne merziminen buryn saılaý ótkizýge shaqyrady.

Bul rette Feıhoo partııasyna da sybaılas jemqorlyqqa qatysty aıyp taǵylyp otyr.

Aıta keteıik, Ispanııa premer-mınıstri Pedro Sanches Eýropalyq Odaqty maýsymdyq ýaqytty ózgertý tájirıbesinen túbegeıli bas tartýǵa shaqyrǵan edi.