Madrıdte qazaqstan-ıspan strategııalyq áriptestigin tereńdetý máseleleri talqylandy

Baspasóz málimetterine qaraǵanda, Qazaqstan Respýblıkasy Syrtqy ister mınıstriniń orynbasary Roman Vasılenko jáne Ispanııanyń Syrtqy ister jónindegi Memlekettik hatshysy Fernando Valensýela 2019 jylǵy 29 naýryzda Madrıdte ótken qazaqstan-ıspan saıası konsýltatsııalary barysynda eki el arasyndaǵy strategııalyq áriptestikti tereńdetýge bet burýdy ýaǵdalasty.

Kezekti saıası konsýltatsııalar barysynda saıası, saýda-ekonomıkalyq jáne mádenı-gýmanıtarlyq blok máseleleri, quqyqtyq bazany keńeıtý, sondaı-aq halyqaralyq kún tártibindegi ózge de ózekti máseleler boıynsha pikir almasyldy.

Konsýltatsııalar 2019 jylǵy 2 shildede jasalǵan Qazaqstan men Ispanııa arasyndaǵy strategııalyq seriktestik týraly sharttyń 10 jyldyǵy qarsanynda ótkizildi. Osy ýaqyt aralyǵynda eki el arasyndaǵy qarym-qatynastar jetile tústi. Atap aıtqanda turaqty túrde iske asatyn joǵary deńgeıdegi issaparlar, áriptestiktiń mańyzdy sharttyq-quqyqtyq bazasy, birneshe ese ulǵaıǵan eki jaqty saýda aınalymy jáne halyqaralyq qurylymdar sheńberinde ornatylǵan ózara qoldaý mehanızmi.

Taraptar QR Tuńǵysh Prezıdenti - Elbasy Nursultan Nazarbaevtyń eki el arasyndaǵy strategııalyq seriktestiktiń bastamasyn qurýdaǵy tarıhı rólin asa atap ótti. N. Nazarbaevtyń Ispanııaǵa saparlary jáne Hýan Karlos І men Felıpe VI Qazaqstanǵa saparlary eki jaqty qatynastardyń qarqyndy damýyna sebep boldy.

Ispan tarapyna Korol Felıpe VI Elbasynyń atyna Memleket basshysy retinde jumysyn aıaqtaǵany jáne Qasym-Jomart Toqaevtyń QR Prezıdenti laýazymyna kiriskenine oraı quttyqtaý hattary úshin alǵys aıtyldy.

F. Valensýela Qazaqstannyń aımaqtaǵy óńirlik jáne jahandyq qaýipsizdikti nyǵaıtýǵa baǵyttalǵan bastamalardyń mańyzdylyǵyn atap óte otyryp, Qazaqstannyń syndarly jáne halyqaralyq arenadaǵy belsendi róline toqtaldy.

Taraptar ústmizdegi jyldyń 19-20 naýryzynda Madrıdte 80-ge jýyq ıspan kompanııalary qatysqan qazaq-ıspan «roýd-shoýynyń» tabysty ótkenin atap ótti. Onda eki eldiń isker toptary arasyndaǵy yntymaqtastyqtyń perspektıvalyq jobalary talqylanǵanyn qoldady. Saıası konsýltatsııalarda tsıfrlandyrý, ınfraqurylymdyq jobalar, aýyl sharýashylyǵy jáne agroónerkásiptik keshen, jańartylatyn energetıka, qurylys, ınjenerlik, qorǵanys jáne aeroǵarysh salalaryndaǵy yntymaqtastyqty tereńdetýdiń keń áleýetin atap ótti.

Ispan seriktesteriniń nazary Qazaqstannyń geografııalyq ornalasýyn jáne elimiz arqyly ótetin kólik-logıstıkalyq baǵyttaryn eskere otyryp, qosymsha qunmen birlesken ónim óndirisin qurýdyń tartymdylyǵyna basa nazar aýdaryldy. Qazaqstan delegatsııasy «Astana» Halyqaralyq qarjy ortalyǵy bazasynda iskerlik qatynastardy damytý perspektıvalaryna erekshe nazar aýdardy.

Mádenı-gýmanıtarlyq baılanystardy nyǵaıtý týraly aıta kele, ıspan tarapy ıspan tilin úırenýge múmkindik beretin Ispanııa Elshiliginiń Nur-Sultandaǵy jańa ǵımaratynda «Servantes buryshynyń» jaqyn arada ashylatynyn jarııalady.

Óz kezeginde R. Vasılenko bıylǵy jyly Madrıdte ıspan tilindegi Elbasy N.Nazarbaevtyń «Táýelsizdik dáýiri» kitaby jáne qazaq prozasy men poezııasynyń antologııasy usynylatynyń jetkizdi. Sáýirdiń sońynda Madrıdte «Equus: Jylqy Tarıhy» derekti fılminiń premerasy ótedi.

Qazaqstan Respýblıkasy Syrtqy ister mınıstri basshysynyń orynbasarymen birge Ispanııa astanasyna Qazaqstan Respýblıkasy Indýstrııa jáne ınfraqurylymdyq damý mınıstrliginiń Azamattyq avıatsııa komıtetiniń tóraǵasy Talǵat Lastaev, ulttyq ekonomıka, tsıfrlyq damý, qorǵanys jáne aeroǵarysh mınıstrlikteriniń ókilderi, sondaı-aq «Qazaqstan Injınırıng» ulttyq kompanııasynyń ókilderi keldi.

Kelissózderdiń sońynda R. Vasılenko «EFE» jetekshi ıspan aqparattyq agenttigine suhbat berdi. Suhbat barysynda ekijaqty yntymaqtastyqtyń jaı-kúıi men perspektıvalary týraly ózekti suraqtarǵa jaýap berdi, sondaı-aq Qazaqstannyń ishki saıası ómirindegi sońǵy ózgerister týraly habardar etti.

Anyqtama retinde: Ispanııa saýda aınalymy boıynsha Qazaqstannyń eń iri on saýda seriktesteri qataryna kiredi. 2018 jyly ekijaqty taýar aınalymy 20% artyp, $ 2.041 mlrd. quraǵan. 2005 jyldan bastap 2018 jyldyń III toqsanyna deıin Ispanııadan Qazaqstanǵa tikeleı ınvestıtsııalardyń jalpy aǵymy 205,4 mln AQSh dollaryn qurady. Qazaqstanda ıspan kapıtaly bar 66 kásiporyn tirkelgen.