Madrıdte Qazaqstan halqynyń tilderi kúnine arnalǵan shara ótti
ASTANA. Qyrkúıektiń 28-i. QazAqparat - Qazaqstan Respýblıkasynyń Ispanııa Koroldigindegi Elshiligi Qazaqstan halqynyń tilderi kúni merekesin ótkizdi. Atalǵan is-sharaǵa Ispanııadaǵy qazaq dıasporasynyń ókilderi, Elshilik qyzmetkerleri jáne olardyń otbasy músheleri belsene qatysty, dep habarlady syrtqy saıasat vedomstvosynyń baspasóz qyzmetinen.
Qazaqstan Respýblıkasynyń Ispanııa Koroldigindegi Elshisi Erǵalı Bólegenov mereke kúnine arnaǵan sózinde osy merekeniń Respýblıkamyzdyń kópulttyq el ekendigin anyq kórsetetinin, memleket basshylyǵynyń júrgizip otyrǵan saıasaty Qazaqstanda turatyn ulttardyń etnıkalyq toptarynyń teńdigin kúsheıtýge baǵyttalǵanyn atap ótti.
Qazaqstan dıplomaty tyńdarmandardyń nazaryn memlekettik til saıasatynyń quqyqtyq negizine, onyń ishinde «QR tilderi týraly» jáne «QR bilim týraly» zańdaryna, 2005-2010 jyldarǵa josparlanǵan tilderdiń jumys isteýi men damýy týraly memlekettik baǵdarlamasyna aýdardy. Osymen birge, Qazaqstanda osy táýelsizdik jyldarynda úlken tabystarmen ótkizilip otyrǵan saıası jáne ekonomıkalyq reformalardyń elimizdegi tilderdiń damýyna etken oń áserin belgiledi.
Merekeleý sheńberinde Elshilikte ár qatysýshynyń qazaq tilin qanshama meńgergenderin kórsetetin konkýrs uıymdastyryldy. Konkýrsta qatysýshylar óziniń qazaq tilindegi ónerlerin kórsetti - bireýleri qazaqsha óleńder aıtyp, dombyra tartsa, keıbireýleri qazaq halqynyń belgili aqyndarynyń dastandarynan úzindiler, maqal-mátelder aıtyp jarysty. Sonymen birge merekeli keshte tematıkalyq fotosýretter kórmesi kórsetildi.
Merekelik sharalardy bitirý aldynda, Ispanııada - uly Servantestiń jerinde týylǵan jas nárestege, elshilik qyzmetkeriniń balasy, Qazaqstan Respýblıkasynyń azamatyna resmı túrde Týý týraly kýálik tapsyryldy.
