Madrıdte fýtboldan álem chempıondaryn mıllıonnan astam jankúıer qarsy aldy
ASTANA. KAZINFORM – Ispanııa quramasynyń fýtboldan 2026 jylǵy álem chempıonatyndaǵy tarıhı jeńisin Madrıdte mıllıonnan astam jankúıer birge atap ótti, dep habarlaıdy Euronews.
Ispanııa quramasynyń oıynshylary koroldik Sarasýela saraıy men premer-mınıstrdiń Monkloa rezıdentsııasyndaǵy resmı qabyldaýlardan keıin ashyq avtobýspen Madrıd kósheleri arqyly Sıbeles alańyna bet aldy. Jol boıyna jınalǵan jankúıerler chempıondardy qoshemettep, «Ispanııa! Ispanııa!» dep urandatty.
Ispanııa úkimetiniń ókildigi málimetinshe, chempıondardy qarsy alýǵa avtobýstyń júrý baǵyty boıyna 1 mıllıonnan astam adam jınalǵan.
Negizgi merekelik is-sharalar Sıbeles alańynda ótti. Álem chempıondary ashyq avtobýstan jankúıerlerge qol bulǵap, jeńip alǵan kýbokty joǵary kóterip, jeńisti halyqpen birge atap ótti.
Dúısenbi kúni ulttyq quramany Sarasýela saraıynda Ispanııa koroli Fılıpp VI, patshaıym Letıtsııa, taq murageri hanshaıym Leonor men ınfanta Sofııa qabyldady. Keıin komanda premer-mınıstr Pedro Sanchespen Monkloa rezıdentsııasynda kezdesti.
– Bul – naǵyz tarıhı jeńis. Sizder Ispanııany álem fýtbolynyń shyńyna qaıta shyǵardyńyzdar, – dedi korol Fılıpp VI ulttyq quramamen kezdesýde.
Al premer-mınıstr Pedro Sanches fýtbolshylar men bapkerler shtabyna alǵys aıtyp, komandany 2030 jylǵy álem chempıonatynda da chempıondyq ataqty qorǵaýǵa shaqyrdy.
Ispanııa quramasy álem chempıony kýbogyn otanyna 2010 jyly Ońtústik Afrıkada qol jetkizgen tarıhı jeńisten keıin 16 jyldan soń qaıta alyp keldi.
Sonymen qatar Halyqaralyq fýtbol federatsııasy (FIFA) álem chempıonatynyń fınalynan keıin bolǵan janjalǵa baılanysty Argentına quramasyna qatysty tártiptik is qozǵady.
FIFA málimetinshe, fınaldyq oıyn aıaqtalǵannan keıin argentınalyq jartylaı qorǵaýshy Leandro Paredes Ispanııa qorǵaýshysy Erık Garsııaǵa soqqy jasap, jartylaı qorǵaýshy Gavıdi ıtergen. Sondaı-aq Naýel Molına ıspanııalyq Rodrıge shabýyl jasaýǵa árekettense, Argentına quramasynyń bapkerler shtabynyń múshesi Roberto Aıala Danıel Olmomen qaqtyǵysqa túsken.
– Oqıǵanyń barlyq mán-jaıy zertteledi. Tártiptik komıtet esep daıyn bolǵannan keıin qosymsha aqparat beredi, – delingen FIFA habarlamasynda.
Aıta keteıik, álem chempıonatynyń fınaly AQSh-tyń Nıý-Djersı shtatynda ótip, Ispanııa quramasy Argentınany qosymsha ýaqytta 1:0 esebimen jeńip, óz tarıhyndaǵy ekinshi álem chempıondyǵyn jeńip aldy.
