Madrıdte Dımash Qudaıbergen týraly derekti fılmniń tusaýkeseri ótti
ASTANA. KAZINFORM – 30 mamyr kúni Madrıd qalasynda Dımash Qudaıbergenniń shyǵarmashylyǵy men onyń ıspandyq jankúıerler qaýymdastyǵyna arnalǵan «Al Compás de Su Voz» derekti fılminiń tusaýkeseri ótti. Bul týraly Dimashnews.com saıty habarlady.
Joba ártistiń Ispanııadaǵy fan-klýby men La Gran Voz Kazaja qaýymdastyǵynyń birlesken bastamasymen júzege asyryldy. Fılmniń rejısseri — jas ıspan kınematografısi Davıd Kolıantes Rodrıges.
Kórsetilim Palacio de Hielo kınoteatrynda ótip, 130-dan astam kórermen jınady. Qonaqtar qatarynda Qazaqstannyń Ispanııadaǵy elshiliginiń ókilderi, elshi Danat Musaev bastaǵan dıplomatııalyq korpýs músheleri, qazaq dıasporasynyń ókilderi, qoǵamdyq uıym músheleri, sondaı-aq jas qazaqstandyq ánshi Janel Álı boldy. Buǵan deıin 15 jastaǵy oryndaýshy Barselonadaǵy kontsert barysynda Dımashpen birge bir sahnada óner kórsetken edi. Fılmde fınaldyq tıtrlarynda súıemeldeýmen, onyń oryndaýyndaǵy Te prometo áni shyrqalady.
Bul derekti fılm Ispanııada alǵash ret tek ártistiń ózine ǵana emes, onyń jankúıerler qaýymdastyǵyna — Dears ókilderine arnalǵan kınojoba retinde jaryq kórdi. Sıýjet jelisiniń negizinde fan-qoǵamdastyqtyń bes múshesiniń oqıǵalary jatyr, olar Dımash shyǵarmashylyǵymen alǵash tanysqan sátteri men fandomnyń óz ómirlerindegi mańyzy týraly áńgimeleıdi.
Fılmdi túsirý barysynda rejısser Ispanııanyń túrli óńirlerin aralap, kartına keıipkerlerimen kezdesip, qazaqstandyq ánshiniń halyqaralyq jankúıerler qaýymdastyǵy fenomenin zerttedi.
Joba avtorlarynyń aıtýynsha, fılmniń basty maqsaty — álemge «Dımash qozǵalysy» dep atalatyn qubylysty, ıaǵnı ártistiń álemniń túkpir-túkpirindegi tyńdarmandaryna tıgizip otyrǵan mádenı jáne emotsııalyq yqpalyn kórsetý.
Premeralyq kórsetilim aıaqtalǵannan keıin qonaqtar men jankúıerler merekelik keshke jınalyp, áserlerimen bólisip, fılmniń jaryqqa shyǵýyn atap ótti.
Jaqyn arada derekti fılm Ispanııadaǵy birqatar ulttyq kınofestıvalde kórsetiledi. Festıvaldik prokat aıaqtalǵan soń, týyndyny ashyq onlaın-platformalarda jarııalaý josparlanýda. Halyqaralyq aýdıtorııa úshin aǵylshyn, qazaq, orys jáne qytaı tilderinde sýbtıtrler daıyndalady.
Fılm avtorlary kartına tek Dımashtyń jankúıerleriniń ǵana emes, qazaqstandyq ártistiń shyǵarmashylyǵyn endi tanyp jatqan kórermenderdiń de yqylasyna bólenedi dep úmit bildirdi.
Aıta ketelik Dımash Qudaıbergen jankúıerlerin jańa jobamen qýantqany týraly jazǵan edik.
