Madrıdte Abaıdyń 180 jyldyǵy men Astana kúnine arnalǵan merekelik kontsert ótti
ASTANA. KAZINFORM – 11 shildede Ispanııanyń Madrıd qalasynda qazaqtyń uly oıshyly, aqyny Abaı Qunanbaıulynyń 180 jyldyq mereıtoıy men Astana kúni toılandy.
Іs-sharany «Otandastar qory» KeAQ, Qazaqstan Respýblıkasynyń Ispanııa Koroldigindegi Elshiligi jáne Túrkistan oblysynyń qoldaýymen birlesip uıymdastyrdy. Merekelik kontsertte Túrkistan oblysynyń Shámshi Qaldaıaqov atyndaǵy fılarmonııasynyń ónerpazdary, «Tumar» folklorlyq ansambli, «Farab» bı ansambli jáne «Arqaıym» neo-etno-folk toby óz ónerlerin kórsetti. Sonymen qatar shara aıasynda «VK Kerbez» qazaqstandyq etnodızaınerleriniń ulttyq naqyshtaǵy sán kórmesi uıymdastyryldy.
Kontsertti «Farab» bı ansambli «Kerbez sylqym» bıimen ashyp, kesh shymyldyǵyn ásem ulttyq órnekpen túrdi. «Tumar» ansambli oryndaǵan «Adaı» jáne «Balbyraýyn» kúıleri kórermenderge tereń rýh berip, qazaq dalasynyń únin jetkizdi. Al fılarmonııa ánshisi Danııar Barystyń sheber oryndaýyndaǵy «Dýdaraı» áni kesh qonaqtarynyń júregin tebirentti.
Sán kórmesinde «VK Kerbez» dızaınerleri 10-nan astam zamanaýı ulttyq kıim úlgilerin usyndy. Qazaqtyń sheberlik pen náziktik úılesken kıim úlgileri sheteldik kórermenderdiń erekshe qyzyǵýshylyǵyn týdyrdy.
Kontsert sońynda «Arqaıym» toby ulttyq mýzykalyq aspaptarmen tanystyryp, birneshe mýzykalyq kompozıtsııa oryndap, kórermenderge erekshe áser syılady.
Іs-sharaǵa 300-ge jýyq adam qatysty. Olardyń qatarynda Eýropada turatyn qazaq dıasporasynyń ókilderi, «DearsDimash» fan-klýbynyń músheleri, dıplomatııalyq korpýs ókilderi jáne Madrıd qalasynyń jergilikti bılik músheleri boldy. Ispanııanyń Barselona, Valensııa, Granada qalalarynan, sondaı-aq Majarstannyń Býdapesht qalasynan arnaıy kelgen otandastar ulttyq ónerimizge degen zor qurmetterin bildirdi.
Valensııa qalasynan kelgen Klara mundaı kontsertti Qazaqstanda júrip te kórmegenin, is-sharanyń joǵary deńgeıde uıymdastyrylǵanyn aıtty.
– Kontsert tamasha ótti. Bári unady. Elge degen saǵynyshymyzdy basqandaı boldyq, - dep júrekjardy lebizin bildirdi.
Al Madrıdtegi otandasymyz Janat Nurbaeva merekelik keshten bir jylǵa jetetin qýat alǵanyn jetkizdi. Ol budan bylaı shetelde mádenıetimiz ben tilimizdi nasıhattaýdy alańsyz jalǵastyra beretinin aıtty.
Bul merekelik kesh sheteldegi qazaqtarǵa týǵan eldiń rýhanı tynysyn sezindirip, ulttyq biregeılikti saqtaý men mádenı baılanysty nyǵaıtý baǵytyndaǵy mańyzdy qadam boldy.
Buǵan deıin sheteldegi qazaq balalary Býrabaıda demalatynyn habarlaǵan edik.