Madrıdte 200-ge jýyq muǵalim ereýil kezinde tasjoldy jaýyp tastady
ASTANA. KAZINFORM — Ispanııa astanasy Madrıdte bilim berý salasy qyzmetkerleriniń ereýili kezinde 200-ge jýyq muǵalim tasjoldyń bir bóligin jaýyp, kólik qozǵalysyn toqtatty. Bul týraly BelTA jazdy.
El País basylymynyń málimetinshe, muǵalimder búgin Madrıdtiń Moratalas aýdanynda narazylyq aktsııasyn ótkizgen. Tańǵy saǵat 8:30 shamasynda, kólik qozǵalysy eń qarqyndy ýaqytta, olar joldyń ústine mektep partalary men oryndyqtardy shyǵaryp, Madrıd qalasynyń ortalyǵyna qaraı baǵyttalǵan kólik qozǵalysyn tolyǵymen bógegen.
— Memlekettik bilim berý satylmaıdy! Memlekettik bilim berýdi qorǵaý kerek! — dep urandatty narazylyq bildirýshiler.
Aktsııaǵa qatysýshylardyń biri El País gazetine bergen suhbatynda aımaqtyq mınıstr ótken aptada ereýilge shyqqan 40 myńnan astam muǵalimmen kelissóz ústeline otyrýdan bas tartyp otyrǵanyn aıtty.
Onyń sózinshe, narazylyq bildirýshiler bilim berý sapasyn arttyrýdy, synyptardaǵy oqýshylar sanyn azaıtýdy jáne muǵalimderdiń jalaqysyn kóterýdi talap etedi.
— Bılik ókilderi bizben, ata-analarmen jáne stýdenttermen kelissóz júrgizýge kelispeıinshe, toqtamaımyz, — dedi ol. Sondaı-aq mundaı narazylyq aktsııalary jalǵasa beretinin eskertti.
Ereýil bastalǵannan keıin jarty saǵat ótken soń polıtsııa qyzmetkerleri oqıǵa ornyna kelip, aktsııany toqtatyp, joldy ashýǵa kiristi.
Buǵan deıin Frantsııada jappaı tártipsizdikterden keıin keıbir aýmaqtarda jergilikti komendanttyq saǵat engiziletini habarlanǵan bolatyn.
