Madrıd pen Barselona arasynda joǵary jyldamdyqty poıyz qatynaıdy

ASTANA.KAZINFORM - Ispanııa bıligi Madrıd pen Barselona arasyndaǵy temirjol jelisin jańǵyrtpaq. Jańa joǵary jyldamdyqty «AVE» jelisi Barselona men Madrıd arasyndaǵy jol júrý jyldamdyǵyn saǵatyna 350 km-ge deıin arttyryp, ýaqytyn eki saǵatqa jetkizýdi josparlap otyr, dep habarlaıdy Kazinform menshikti tilshisi.

Ispanııanyń kólik jáne turaqty mobıldilik mınıstri Oskar Pýente eldiń «joǵary jyldamdyq kezeńine aıaq basatynyn» málimdedi. Al bul ilgerileýdi birinshi bolyp eldiń eń qarbalas jáne eń básekege qabiletti - Madrıd pen Barselonany baılanystyratyn jeli baıqap kóredi.

Ispan baspasóziniń habarlaýynsha, jospar óte aýqymdy, rekordtyq deńgeıge jetýge jaqyn. Ol poıyzdyń maksımaldy jyldamdyǵyn saǵatyna 350 shaqyrymǵa deıin arttyrýdy kózdeıdi. Úkimet bul arqyly jol júrý ýaqytyn eki saǵatqa deıin qysqartýǵa úmitti.

- Saǵatyna 350 km jyldamdyqpen qytaılar ǵana júredi, - dep atap ótti Pýente brıfıngte.

Bul Ispanııany jyldam júretin poıyz boıynsha álemdegi ekinshi el etedi. Máselen, Japonııada joǵary jyldamdyqty poıyzdar saǵatyna 320 km jyldamdyqpen júredi.

Qazirgi ýaqytta jeli joǵary jyldamdyqqa arnalǵanymen, poıyzdar saǵatyna eń kóbi 300 km (nemese keıbir ýchaskelerde 310 km/saǵ) jyldamdyqpen júredi. 350 km/saǵ jyldamdyqqa deıin jańartý tek bedel máselesi emes, logıstıkalyq qajettilik.

Mınıstr bul jedeldetýdiń sebebin túsindirdi. Temirjoldardy lıberalızatsııalaý jáne Ýıgo men Irıo jelileriniń qosylýymen Madrıd-Barselona jelisi shamadan tys júkteme sheginde tur.

Syıymdylyqty arttyrý jáne qyzmetter sanyn kóbeıtý úshin tek eki nusqa bar: temirjol sanyn arttyrý ıaǵnı jańa joldar salý nemese jyldamdyqty arttyrý.

Ispanııanyń Kólik departamenti sońǵy nusqany tańdady. Jyldamdyqtyń artýy poıyzdardyń jıi júrýine múmkindik beredi. Qarapaıym tilmen aıtqanda, eger poıyzdar jyldam júrse, olar tsıkldi tezirek aıaqtaıdy jáne kelesi poıyzǵa jol ashady, bul jıilik pen syıymdylyqty arttyrady.

Pýente temirjoldardy jańartý protsesi qazir bastalatynyn, biraq birtindep, bólim boıynsha júzege asyrylatynyn málimdedi.

Jańǵyrtý jospary tek negizgi jelini ǵana emes, sonymen qatar qazirgi ýaqytta problemaly bolyp otyrǵan iri qalalarǵa kiretin joldardy da qamtıdy. Madrıdte Atocha men Chamartındegi keptelisti azaıtý úshin Parlada jańa joǵary jyldamdyqty temirjol stantsııasy salynady. Barselonada bolashaq La Sagrera habyna nazar aýdarylady.

Biz buǵan deıin QTJ-nyń 70 jyldary shyǵarylǵan lokomotıvterden arylý jospary týraly jazǵan bolatynbyz.