Mádmın: Qazaqfılm basshysyn aýystyrý máselesi kún tártibinde joq

ASTANA. KAZINFORM – Mádenıet jáne aqparat mınıstrligi Kazinform saýalyna joldaǵan jaýapta «Qazaqfılm» basshysynyń qyzmetine laıyqsyzdyǵy týraly jarııa túrde aıtylyp júrgen syndar týraly vedomstvonyń ustanymyn bildirdi.

- Qazirgi tańda «Sháken Aımanov atyndaǵy «Qazaqfılm» ulttyq kınostýdııasy» aktsıonerlik qoǵamy basshysynyń orynbasary A.O. Omarovqa basshynyń mindetterin ýaqytsha atqarý júktelgen. Búgingi tańda mınıstrlik deńgeıinde kınostýdııa basshysyna qatysty máseleni qaraý josparlanbaǵan, - dep jazylǵan jaýapta.

Buǵan deıin mınıstr Aıda Balaeva «Qazaqfılm» mekemesiniń basshysyna eń birinshi kezekte qandaı talaptar qoıylatynyn aıtqan bolatyn. 

Sondaı-aq jýyrda «Qazaqfılmdi» otbasylyq demalys ortalyǵyna aınaldyrýǵa kómektesetin ınvestor izdeý jumystary júrip jatqany málim boldy.

— Sol jerde jeke kınoteatr, jabyq jazǵy kınoteatr salsaq, «Qazaqfılm» mýzeıin qursaq, arnaıy taqyryptyq dúkender men basqa da nysandardy ashsaq deımiz, — dedi A. Balaeva.

Sonymen birge, mınıstr «Qazaqfılmniń» jeri satylmaıtynyn nemese úshinshi tulǵalarǵa berilmeıtinin, tek osy uıymdy damytý úshin ǵana paıdalanylatynyn atap ótken edi.