Madııar Januzaq sharshy alańǵa «Alash urany» kompozıtsııasymen shyǵady
ASTANA. QazAqparat - Qazaqstannyń kásipqoı boksshysy Madııar Januzaq Makaoda (Qytaı) salmaq ólsheý rásiminen ótti, dep habarlaıdy QazAqparat.
«2017 IBF Silk Road Championship» kásibı boks keshi aıasynda RCC Boxing Promotions (Reseı) jáne Alban Boxing Promotions (Qazaqstan) promoýterlik kompanııalarynyń qamqorlyǵymen jekpe-jekke shyǵatyn Madııardyń (2-0-0) salmaǵy 50,4 kelini qurady. Al qarsylasy tájirıbeli taı boksshysy Sýfakıt Kamfanyń salmaǵy 49,7 keli boldy.
Aıta keterligi, Madııar sharshy alańǵa Bekbolat Tileýhannyń «Alash urany» kompozıtsııasynyń súıemeldeýimen shyqpaq. Halyqaralyq boks federatsııasynyń qamqorlyǵymen «2017 IBF Silk Road Championship Tournament» tórtik týrnıri aıasynda ótetin eń jeńil salmaqtaǵy (50,8 keli) kezdesý 3 mınýttan 10 raýndqa sozylady. 
Sýfakıt Kamfa buǵan deıin 10 márte kásibı rıngte kezdesý ótkizip, onyń 7-eýinde jeńiske jetse, úsheýinde qarsylasyna ese jibergen.
Al Qazaqstannyń jasóspirimder jáne jastar arasynda chempıony bolǵan Madııar buǵan deıin kásibı rıngte Kýrbonalı Bobokalonov pen Dmıtrıı Mardasovty jeńgen bolatyn.
