Madııar Áshkeev amerıkalyqty jeńip, alǵashqy tıtýlyna qol jetkizdi

NUR-SULTAN. QazAqparat - Madııar Áshkeev amerıkalyqty jeńip, mansabyndaǵy alǵashqy tıtýlyna qol jetkizdi, dep habarlaıdy QazAqparat Sports.kz-ke silteme jasap.

Arızona shtatynyń (AQSh) Týson qalasynda ótken boks keshinde óner kórsetken jerlesimiz jergilikti boksshy Sesıl Makkallamen aıqasty. Birinshi orta salmaq sanatynda ótken on raýndtyq jekpe-jekte tóreshiler jeńisti biraýyzdan Madııarǵa berdi. Osylaısha, qazaqstandyq boksshy kásipqoı bokstaǵy alǵashqy tıtýly Junior NABF beldigine ıe boldy.

Aıta keteıik, NABF (Soltústik Amerıka boks federatsııasy) Búkilálemdik boks keńesiniń (WBC) júıesine kiredi.

Áshkeev osymen kásipqoı bokstaǵy 11 jekpe-jeginde 11-jeńiske qol jetkizdi, sonyń altaýy - nokaýt. Al 21 jeńisi bar (8 nokaýt) Makkalla tórtinshi ret jeńildi.