Madına Sádýaqasova uldy boldy
ASTANA. QazAqparat - Qazaqtyń ánshi qyzy Mádına dúnıege shekesi torsyqtaı ul ákeldi. Bul jaıly ánshi óziniń facebook paraqshasynda habarlady: Alhamdýllılah, uldy boldyq súıikti jarym Oljaspen!!!
Áleýmettik jelilerde ánshini jankúıerleri men tyńdarmandary jarysa quttyqtap jatyr. Bul qýanyshty jańalyq jaıly áriptesteriniń arasynda alǵashqylardyń biri bolyp «MýzArt» tobynyń ánshisi Sáken Maıǵazıev Instagram-daǵy jeke paraqshasynda jazdy:
- «Súıinshi! Oljas pen Madınanyń aq otaýyna altyn asyqtaı ul keldi! Imandy, bilimdi, ónerli bolyp óssin!
Aıta keteıik, ánshi 1999 jyly "Jas Qanat" baıqaýynda án shyrqap, onyń erekshe daýysyna tánti bolǵan Roza Rymbaeva óz qamqorlyǵyna alady, aq jol, sát sapar tileıdi. Artynsha Roza men Mádına dýet bolyp shyrqaǵan "Maqsat - baqyt bastaýy" atty ánderi jaryq kórdi.
1999 jyly Mádına "Azııa Daýysy" baıqaýynda óziniń baǵyn synaıdy. Sol jyly ol oblysta "jyl adamy" dep tanylady. Odan keıin Prezıdent orkestrinde, "Gúlder" ansambilinde án shyrqaıdy. 2004 jyly Ermek Elgezektiń "Mahabbat jalyny" atty ánine alǵashqy beınebaıanyn túsiredi. Sezimge toly, keremet án halyq arasynda keńinen taralyp ketti. Araǵa kóp ýaqyt salmaı "Ańsaǵanym" dep atalatyn óziniń tuńǵysh án jınaǵy jaryq kóredi.
