Mádına Sádýaqasova mońǵoldyń «Húnıı saıhan setgel» ánin shyrqaıdy

BAıAN-ÓLGEI. QazAqparat - Qazaqstannyń eńbek sińirgen óner qaıratkeri, ánshi Mádına Sádýaqasova men ánshi, sazger Ushqyn Jamalbek Mońǵolııa astanasy Ulanbatyrǵa keldi. Qos ánshi jospar 14 naýryzda Qobdada, naýryzdyń 15-inde Baıan-Ólgeı aımaqtarynda, al 16-synda Ulanbatyr qalasynyń eń úlken kontsert zaly «UB palace»-ta jandy daýysta «Arman elim-aı» atty án keshin kórermenderge tartý etpek. Qazaqstandyq ánshilerdi keshe Ulanbatyr qalasyndaǵy «Shyńǵys han» halyqaralyq áýejaıynan uıymdastyrýshylar alqasy, jankúıerler men BAQ ókilderi qarsy aldy, dep habarlaıdy QazAqparat tilshisi.

Áýejaıda ánshi Mádına Sádýaqasova jýrnalısterge suhbat bergen bolatyn. «Bul menińMońǵolııaǵa alǵashqy saparym emes. Osydan 10 jyl buryn  osynda saparlap kelgenmin. Ol kezde Naýryz kontsertine qonaq retinde qatysyp, án tartýymdy usyndym. Al qázir jeke shyǵarmashylyq kontsertimdi bergeli otyrmyn. Sondaı qýanyshtymyn!», - dedi Mádına Sádýaqasova.

Suhbat barysynda qazaqstandyq ánshi shyǵarmashylyq keshtiń «Naýryz» meıramyna oraı uıymdastyrylǵanymen, barsha mońǵol halqyna arnalatynyn jetkizdi. «Bul keshte Mońǵol eliniń mádenıet qaıratkeri, ánshi Enhzýldyń aıtyp júrgen «Húnıı saıhan setgel» nemese «Adamdardyń aq nıeti» atty ánin mońǵol tilinde oryndaımyn. Ózimniń jańa týyndylarymnan usynamyn. Osydan 28 jyl buryn Baıan-Ólgeı aımaǵynyń Bulǵyn sumynynan Qazaqstanǵa qonys aýdarǵan, daryndy kompozıtor ıAsıra Zahanqyzynyń týǵan jerine arnap jazǵan «Bulǵynym» áni de shyrqalatyn bolady», - dedi Mádına Sádýaqasova. Sondaı-aq, ol «Húnıı saıhan setgel» ániniń maǵynasy men áýenin qatty unatqanyn, sondyqtan tańdaýy osy ánge túskenin atap ótti. «Bul ándi shegine jetkizip oryndaımyn dep oılaıym. Daıyndyǵym da óte jaqsy. Jalpy Mońǵol eliniń ónerpazdarynan áıgili ánshiler Tómórıın Arıýnaa, Batmónhıın Sarantýıaa, Memlekettik syılyqtyń ıegeri ánshi Dorjsúrengıın Boldlardyń shyǵarmalarymen tanyspyn, ánderin súıip tyńdaımyn. Osynda kelerden buryn Mońǵolııada  balet óneriniń álemdik deńgeıge kóterilgenin estip qatty qýandym. Osy tárizdi Mońǵol elinen kóptegen jaqsy isterdi úırenýge bolady», - deıdi ánshi.

Budan bólek, M.Sádýaqasova osy saparyndaǵy baǵdarlamasymen de bólisti. Onyń sózine qaraǵanda, bul joly Mońǵolııada barlyǵy 5 ret kontsert ótkizý josparlanǵan. «Qobda, Baıan-Ólgeı aımaqtarynda jeke-jeke kesh ótedi. Al Ulanbatyrda bir ret qoıylady. Kontserttiń ýaqyty óte tyǵyz. Eger arasy jıi emes bolǵanda ıAsıra apaıdyń týǵan jeri Bulǵynǵa barýshy edim. Ókinishtisi bul joly bara almaıtyn boldym. Búgin Tsonjın boldogtaǵy «Shyńǵys hannyń» eskertkish keshenimen tanysamyn. Kóńil kúıim tamasha!» dep jaýap berdi ánshi tilshilerge.

 

Qýat Ýathanuly