Mádına Ábilqasymova: Aktıvterdiń jańa klasy – tsıfrlyq qarjy aktıvteri engiziledi

ASTANA. KAZINFORM – El aýmaǵynda tsıfrlyq qarjy aktıvteriniń aınalymyna ruqsat berilmek. Bul týraly Májilistiń jalpy otyrysynda bank qyzmeti týraly zań jobasyn tanystyrǵan Qarjy naryǵyn retteý jáne damytý agenttiginiń tóraǵasy Mádına Ábilqasymova aıtty.

- Zań jobasynyń negizgi jańalyǵy – aktıvterdiń jańa klasy retinde tsıfrlyq qarjy aktıvterin retteýdi engizý jáne olardyń Qazaqstan aýmaǵyndaǵy aınalymyna ruqsat berý, - dedi agenttik basshysy.

Onyń sózine qaraǵanda, tsıfrlyq qarjy aktıvteriniń mynadaı úsh túrin engizý kózdelgen:

- Birinshisi – bazalyq aktıvi aqsha bolyp sanalatyn tsıfrlyq qarjy aktıvteri, ıaǵnı steıblkoınder. Steıblkoınderdi shyǵarý, aınalysqa jiberý jáne óteý tártibine, sharttaryna qoıylatyn talaptardy Ulttyq bank aıqyndaıdy.

- Ekinshisi – bazalyq aktıvi qarjy quraldary, qarjy aktıvi, múliktik quqyqtar, taýarlar nemese ózge de múlik bolyp sanalatyn tsıfrlyq qarjy aktıvteri.

- Úshinshisi – tsıfrlyq platformada elektrondyq-tsıfrlyq nysanda shyǵarylatyn qarjy quraldary.

- Agenttikke steıblkoındardan basqa tsıfrlyq qarjy aktıvterin shyǵarý, aınalysqa jiberý jáne óteý tártibine, sharttaryna qoıylatyn talaptardy belgileý ókilettikteri beriledi. Tsıfrlyq qarjy aktıvterin tsıfrlyq platformalar operatorlary shyǵarady. Bul operatorlar – qarjy naryǵynyń jańa sýbektileri, olardyń qyzmetine lıtsenzııany Ulttyq bank beredi. Tsıfrlyq qarjy aktıvterine qoldanystaǵy qarjy quraldary úshin belgilengen uqsas talaptar, onyń ishinde táýekelderdi basqarýǵa, aqparatty jarııa etýge jáne ınvestorlardyń quqyqtaryn qorǵaýǵa qatysty talaptar qoıylady, - dedi Mádına Ábilqasymova.

Ótken jylǵy Joldaýda Prezıdent tsıfrlyq aktıvterdiń aınalymyn qamtamasyz etý jáne bank salasyna ınnovatsııalardy qaýipsizdik talabyna sáıkes engizý úshin ony retteıtin tetikterdiń turaqty bolýy mańyzdy ekenin aıtqan bolatyn.