Mádına Ábilqasymova vedomstvodaǵy bylyq jaıynda: Kináliler jazalandy
ASTANA. QazAqparat - QR Eńbek jáne halyqty áleýmettik qorǵaý mınıstri Mádına Ábilqasymova azamattardy jumysqa ornalastyrý úshin bólingen qarajattyń talan-tarajǵa salynýyna qatysty pikir bildirdi, dep habarlaıdy QazAqparat tilshisi.
«Búgin Bas prokýratýra ótken jyldardaǵy baǵdarlamaǵa júrgizilgen tekserý nátıjesin jarııa etti. Baǵdarlamany júzege asyrý barysynda keı jerlerde aıtarlyqtaı buzýshylyqtar oryn alǵan. Jumysqa ornalastyrý nemese qysqa merzimdi kásibı oqytý týraly jalǵan anyqtamalar anyqtaldy. Atalǵan sharalarǵa 5 mlrd teńge bólinip, 70 myńnan astam adam oqytylǵan. Al jumysqa ornalasqany shamamen 60 paıyz ǵana», - dedi mınıstr Májilistegi parlamenttik tyńdaýdan keıin BAQ ókilderine.
Onyń atap ótýinshe, kinálilerge qatysty sharalar qabyldanǵan.
«Degenmen, baǵdarlamany júzege asyrý eń aldymen jergilikti atqarýshy organdardyń quziretine kiredi. Buzýshylyqtar oryn alǵan Halyqty jumyspen qamtý ortalyqtary qazirgi ýaqytta jergilikti atqarýshy organdardyń baqylaýynda. Árbir fakti boıynsha ákimdiktermen jáne jumyspen qamtý basqarmalarymen mán-jaıdy anyqtadyq. Sharalar qabyldanyp, mundaı buzýshylyqtar jibergen qyzmetkerler jumystan shyǵaryldy», - dedi Mádına Ábilqasymova.
Sonymen qatar ol mınıstrlik oryn alǵan buzýshylyqtardyń sáıkesinshe qorytyndy shyǵarǵanyn basa aıtty.
«Baǵdarlama sharttary jaqsardy. Bul jaıynda búgin aıttym. Oqý oryndaryn irikteý talaptary jaqsartyldy. Materıaldyq bazasy jaqsy, ótken jyldardaǵy jumysqa ornalastyrý kórsetkishi 60 paıyzdan kem emes oqý oryndary ǵana bul baǵdarlamaǵa qosylatyn bolady. Qazirgi ýaqytta atalǵan oqý oryndarynyń tizilimi «Atameken» UKP-men bekitiledi. Sodan keıin óńirlik komıssııaǵa shyǵarylyp, bekitiledi jáne oqý oryndaryn irikteý júrgziledi. Biz talaptardy qatańdatyp, atalǵan tizilimdi qaıta qaraımyz», - dedi mınıstr.
Aıta keteıik, buǵan deıin QR Bas prokýratýrasy halyqty jumyspen qamtý baǵdarlamasy aıasynda bólingen qarajattyń tıimsiz paıdalanǵandyǵyn jáne urlanǵanyn jarııa etken bolatyn.
