Mádına Ábilqasymova shaǵyn jáne orta kásipkerlikti qarjylandyrý týraly aıtty
ALMATY. QazAqparat – QR Qarjy naryǵyn retteý jáne damytý agenttiginiń tóraǵasy Mádına Ábilqasymova shaǵyn jáne orta kásipkerlik sýbektilerin qarjylandyrý týraly aıtty, dep habarlaıdy QazAqparat tilshisi.
Onyń sózine qaraǵanda, basty basymdyq ShOB sýbektileriniń nesıe alýǵa múmkindigin arttyrý bolyp otyr.
«Ulttyq bank Agenttikpen birige otyryp ShOB sýbektilerin qoldaý maqsatynda bıyl naýryzda aınalym kapıtalyn tolyqtyrýǵa jeńildikpen nesıe berý baǵdarlamasyn ashty. Osy baǵdarlama aıasynda ShOB sýbektilerin nesıelendirýge 8% paıyzdyq mólsherlememen 600 mlrd teńge qarastyrylǵan. Memleket basshysynyń tapsyrmasymen iri kásipkerlik nysandaryn qoldaýǵa taǵy 200 mlrd teńge bólindi. Búginde jalpy somasy 448,9 mlrd teńge bolatyn 4361 nesıe berildi», - dedi Mádına Ábilqasymova.
Onyń aıtýynsha, «Bıznestiń jol kartasy-2025» aıasynda nesıe mólsheri 2,5 mlrd teńgeden 7 mlrd teńgege ósken.
«Memleket basshysynyń tapsyrmasymen qazan aıynan bastap pandemııanyń kesirinen turalap qalǵan saladaǵy ShOB sýbektileri nesıesiniń 6 paıyzyna sýbsıdııa qarastyrylǵan», - dedi Mádına Ábilqasymova.
Jalpy memlekettik baǵdarlamalar boıynsha kásipkerlerge bıyl quny 1 mlrd teńge bolatyn 8,5 myń nesıe berildi.
«Bul sharalar ekonomıkalyq belsendilik toqtaǵan kezde nesıelendirý kólemin arttyrýǵa múmkindik berdi. Sáýir-shilde aılarynda nesıelendirý qarqyny tómen bolsa, tamyz aıynan bastap kórsetkish kóterile bastady. 2020 jyldyń 9 aıynyń qorytyndysyna sáıkes ekonomıkany nesıelendirý 3,5%-ǵa ósti», - dedi Agenttik basshysy.
Sonymen qatar, Ulttyq bank, Qarjylyq naryqty retteý men damytý agenttigi, QR Úkimeti tarapynan qaryz júktemesin azaıtý maqsatynda keıbir nesıelerdi tóleý ýaqyty uzartyldy.
TJ kezinde 16 naýryzdan 1 qazanǵa deıin 13 myń ShOB sýbektisi, 1,9 mln azamattyń nesıeni tóleýi keıinge qaldyryldy.
