Mádına Ábilqasymova Prezıdenttiń tapsyrmasyn baıaý atqaryp jatqan óńirlerdi atady
QR Eńbek jáne xalyqty áleýmettik qorǵaý mınıstri Mádına Ábilqasymovanyń aıtýynsha, qalalarda shaǵyn nesıeler 6 mlrd teńgege, al aýyldy jerlerde 14 mlrd-qa ulǵaıdy. Osylaısha, shaǵyn nesıelendirýdiń jalpy somasy 62 mlrd teńgege jetti. Sonyń ishinde 45 mlrd - aýyldarǵa, 17 mlrd qala turǵyndaryna arnalǵan.
«Jyl basynan beri shaǵyn nesıelendirý boıynsha barlyǵy 38 mlrd teńge, sonyń ishinde qalalarda 10,5 mlrd, al aýyldarda 28 mdrd teńge ıgerildi. Ol jospardyń 60 protsentin quraıdy. Qarajatty ıgerý jaǵynan Almaty qalasy, Almaty oblysy, Batys Qazaqstan, Jambyl, Shyǵys Qazaqstan jáne Soltústik Qazaqstan oblystarynda jaqsy kórsetkishter baıqalyp otyr. Al artta qalyp kele jatqan óńirlerdiń ishinde Mańǵystaý, Atyraý, Aqtóbe oblystary jáne Astana qalasy bar», - dedi M.Ábilqasymova.
Osy oraıda, Úkimet basshysy Baqytjan Saǵyntaev Prezıdenttiń tapsyrmasyn baıaý oryndap jatqan aımaqtardy synǵa alyp, qarjyny der kezinde ıgerýdi tapsyrdy. Ákimder jyldyń aıaǵyna deıin barlyq qarajatty ıgerip shyǵýǵa ýáde etti. "Endi, jyldyń aıaǵyna deıin oryndalatynyna senemiz. Biraq bul bastama naýryz aıynda jarııalandy. Qazir qazannyń ortasy boldy. Kásipkerler áli kútip otyr. Sonda olar Prezıdent tapsyrmasynyń oryndalǵanyn bir jyl boıy kúte me? Ol durys emes. Memleket basshysynyń tapsyrmasy ýaqytynda oryndalýy qajet. Negizi, bárimizge syn. Úkimetke de, ákimdikterge de, Atamekenge de. Qarjy berildi. Tapsyrma bar, áli ıgerilmeı jatyr. Osy aıdyń ishinde barlyq problemalar sheshilýi kerek», - dep atap kórsetti B.Saǵyntaev.
Aıta keteıik, Memleket basshysy ózin-ózi jumyspen qamtyǵan jáne jumyssyz júrgen azamattardyń arasynda jappaı kásipkerlikti damytý sharalaryn jalǵastyrýdy tasyrǵan bolatyn. Osyǵaı oraı, jeńildetilgen shaǵyn nesıelerge bólinetin qarjynyń jalpy somasy 62 mıllıard teńgege jetti. Sonyń nátıjesinde shaǵyn nesıe alatyndardyń sany eki esege ósedi degen jospar bar.
