Mádına Ábilqasymova órtten kóz jumǵan balalardyń ata-anasyna baryp kóńil aıtty
ASTANA. QazAqparat - QR Eńbek jáne halyqty áleýmettik qorǵaý mınıstri Mádına Ábilqasymova elordada órtten qaza tapqan 5 balanyń ata-anasyna baryp, kóńil aıtty. Bul týraly búgin Úkimet otyrysyna keıin QR Eńbek jáne halyqty áleýmettik qorǵaý vıtse-mınıstri Svetlana Jaqypova aıtty, dep habarlaıdy QazAqparat tilshisi.
«Biz, mınıstrlik ókilderi qara jamylǵan otbasyna baryp, kóńil aıttyq. Keshe bardyq. Mınıstrdiń (Eńbek jáne halyqty áleýmettik qorǵaý mınıstri Ábilqasymova) ózi de bardy», - dedi Svetlana Jaqypova.
Aıta ketelik, búgingi Úkimet otyrysyna mınıstr qatysqan joq. Onyń ornyna Premer-Mınıstrdiń aldynda vıtse-mınıstr Svetlana Jaqypova esep bergen edi. Vıtse-mınıstrdiń sózine qaraǵanda, mınıstr M.Ábilqasymova ótken aptadan beri syrqattanýyna baılanysty em alyp jatyr.
BAQ ókilderi vıtse-mınıstrden «Kópbalaly otbasylarǵa kórsetiletin memlekettik qoldaý jetkilikti me?» dep suraǵan edi. Osyǵan oraı, ol kópbalaly otbasylardy qoldaý sharalary qaıta qaralatynyn aıtty.
Sondaı-aq, jıynnan keıin tilshiler órtten qaza tapqan balalardyń ata-anasynyń nelikten túngi kezekshilikte bolǵanyn surady.
«Bul olardyń tańdaýy», - dep jaýap berdi Svetlana Jaqypova.
Eske sala keteıik, 4 aqpan kúni túnde «Kóktal-1» turǵyn úı alabynda jeke úıdiń aýlasynda turǵyzylǵan ýaqytsha baspanadan órt shyqty. Órtti sóndirý barysynda 2006, 2008, 2014, 2016, 2018 jyldary týǵan 5 qyz balanyń denesi tabyldy. Olardyń eń kenjesi nebári 11 aılyq sábı edi.
Qaıǵyly oqıǵa kezinde bes balanyń ata-anasy túngi jumysta bolǵan. Búgin 5 balany elordalyqtar aqtyq saparǵa shyǵaryp saldy. Sondaı-aq, Elbasy órtte qaza bolǵan balalardyń otbasyna kóńil aıtty.
