Mádına Ábilqasymova elden kapıtaldy negizsiz shyǵarýdy shekteý is-sharalaryn atady
«Memleket basshysynyń elden kapıtaldy negizsiz shyǵarýdy shekteý jónindegi tapsyrmasyn iske asyrý úshin agenttik Ulttyq bankpen jáne Qarjylyq monıtorıng agenttigimen birlesip, osy jylǵy 10 qańtarda transshekaralyq qarjylyq operatsııalardy júrgizýge baqylaý is-sharalaryn kúsheıtý týraly birlesken buıryqty qabyldady», - dedi agenttik tóraǵasy.
Ol kúdikti transshekaralyq operatsııalar tizbesi, sondaı-aq klıentterdi tıisinshe tekserýdiń kúsheıtilgen is-sharalary boıynsha qarjylyq monıtorıng sýbektileriniń is-qımyl tártibi belgilengenin atap ótti.
«Agenttik atalǵan buıryq aıasynda bankterdiń klıentterdi tıisinshe tekserý jónindegi kúsheıtilgen is-sharalardy saqtaýyn baqylaıdy. Sondaı-aq bank klıentteriniń iri transshekaralyq operatsııalaryna elden kapıtaldy zańsyz shyǵarý belgileriniń bolýy turǵysynan kúndelikti monıtorıng júrgizetin bolady», - dedi Mádına Ábilqasymova.
Aıta keteıik, Memleket basshysy Parlament Májilisiniń jalpy otyrysynda jekelegen-qarjy ónerkásiptik toptardyń tótenshe jaǵdaıdy paıdalanyp, qarjyny shetelge shyǵarý táýekeli artyp turǵanyn jetkizgen bolatyn.