Madına Ábilqasymova: Elbasy tapsyrmasyna oraı jastardy qoldaý sharalary kúsheıtiledi
«Elimizde jastardy qoldaý baǵytynda kóptegen ıgi is-sharalar qolǵa alynýda. Búgingi jıynda Memleket basshysy bilimge qoljetimdilik, alǵashqy mamandyqqa ıe bolý sekildi jumystardy keńeıtý qajettigi týraly sóz qozǵady. Jastardy qoldaý baǵytyndaǵy mańyzdy jumystardyń biri - jastardyń kásipkerligin qoldaý tetikteri. Búgin Elbasy mańyzdy eki jobanyń - «Jas maman» jáne «Jas kásipker» jobasynyń bastalatynyn aıtyp ótti. Halyqty jumyspen qamtý baǵdarlamasy aıasynda qazirgi tańda bizde kásipkerlikti qoldaýdyń naqty tetikteri bar. Birinshiden, mıkronesıelerdi berý, granttardy usyný, birinshi jumys mamandyǵyn alý, biliktilikti arttyrý sekildi múmkindikter jastarǵa kóp kómegin tıgizip jatyr», - dedi QazAqparat tilshisine mınıstr Astanada ótken «Táýelsizdiktiń urpaqtary» atty Jastar jylynyń ashylý saltanatynan keıin.
Vedomstvo basshysynyń aıtýynsha, Qazaqstan Prezıdenti jarııalaǵan jobalar aıasynda jastardy qoldaý baǵytyndaǵy jumys kúsheıetin bolady.
«Naqtyraq aıtqanda, osy jobalar aıasynda jastardy qoldaý sharalarynyń aýqymyn keńeıtetin bolamyz. Bilim men grant alý, mıkronesıe alý, óz bıznesin ashý, jastardy jumysqa ornalastyrý baǵytynda jastarǵa kórsetiletin kómekti kúsheıtemiz», - dep túıdi Madına Ábilqasymova.
Eske sala ketsek, búgin Jastar jylynyń ashylýyna arnalǵan saltanatty jıynda Elbasy Nursultan Nazarbaev «Jas maman» baǵdarlamasyn ázirleýdi tapsyrǵan bolatyn.
«Úkimet 100/200 qaǵıdasy boıynsha «Jas maman» baǵdarlamasyn ázirleýi kerek. Úsh jylda joba elimizdiń barlyq óńirinde 200 myńǵa tarta jas azamattarymyzdy qamtýy tıis. Onyń aıasynda eń suranysqa ıe ındýstrıaldyq-servıstik 100 kásip boıynsha jetildirilgen 200 oqý orny bazasynda mamandardy daıarlaǵymyz keledi», - degen edi Prezıdent.
