Mádına Ábilqasymova bıyl 700 myń adamdy jumysqa ornalastyrmaq
ASTANA. QazAqparat - Aǵymdaǵy jyly 700 myń qazaqstandyq jumysqa ornalasatyn bolady. Bul týraly QR Parlamenti palatalarynyń birlesken otyrysynda depýtattardyń saýalyna jaýap bergen Eńbek jáne halyqty áleýmettik qorǵaý mınıstri Mádına Ábilqasymova málim etti, dep habarlaıdy QazAqparat tilshisi.
«2017 jyldyń sońynda elimizdegi jumyssyzdyq deńgeıi 4,9 paıyzdy qurady. Atap ótý kerek, bul kórsetkish 7 jyldyń ishinde 11 paıyzǵa tómendedi. Biraq, jumyssyzdyq deńgeıin qarastyrǵanda eńbek naryǵynda bolyp jatqan úrdisterdi de eskergenimiz jón. Jalpy alǵanda eńbek naryǵynda jyl saıyn 2,2 mıllıonnan astam adam aınalymda bolady. ıAǵnı, bireýleri jumysyn aýystyrsa, endi biri zeınetke shyǵyp jatady. Taǵy biri alǵash ret eńbek naryǵyna qosylady», - dedi mınıstr.
Onyń dereginshe, sońǵy jyldary jyl saıyn 300 myńnan astam jas eńbek naryǵyna qosylady. Al 2021 jylǵa qaraı olardyń sany 1,3 mıllıonǵa jetpek.
«Sol sebepten memlekettik baǵdarlamalar aıasynda kóptegen sharalar jastardy jumysqa ornalastyrýǵa baǵyttalyp otyr. Olardyń ishinde eń bastysy «Nátıjeli jumyspen qamtý» jáne «Jappaı kásipkerlikti damytý» baǵdarlamalary. Atalǵan baǵdarlamalar aıasynda byltyr 572 myń adam jumysqa ornalasyp, bilimderin jetildirý sharalaryna tartyldy. Onyń ishinde turaqty eńbekke 318 myń adam ornalastyryldy. Osy jyly biz bul kórsetkishti eki ese arttyramyz. Bizdiń maqsat - bıyl 700 myń adamdy jumysqa ornalastyryp, bilimdi jetildirý sharalarymen qamtamasyz etý. Osy sharalar jumyssyzdyq deńgeıin birqalypty ustap turýǵa septigin tıgizedi dep senemiz», - dedi Mádına Ábilqasyova.
