Mádına Ábilqasymova Amanat partııasynyń qabyldaýynda azamattardyń ótinishterin qarady

NUR-SULTAN. QazAqparat – «Halyq únine qulaq asatyn memleketti» qalyptastyrý jónindegi mindet sheńberinde QR Qarjy naryǵyn retteý jáne damytý agenttiginiń Tóraǵasy Mádına Ábilqasymova azamattardy Amanat partııasynyń qoǵamdyq qabyldaý bólmesinde onlaın túrde qabyldady. Bul týraly QazAqparat Agenttiktiń baspasóz qyzmetine silteme jasap habarlaıdy.

Kezdesýde kepilmen berilgen kredıttik qaryzdardy qaıta qarjylandyrýǵa, Ipotekalyq qaryzdardy qaıta qarjylandyrý baǵdarlamasyna qatysýǵa, sondaı-aq halyqtyń áleýmettik osal toptarynyń ókilderi úshin qaryzdardy qaıta qurylymdaýǵa qatysty máseleler qaraldy.

Atap aıtqanda, qarjy retteýshisiniń basshysyna óz problemalaryn sheshýge kómek surap Nur-Sultan, Almaty jáne Qaraǵandy qalalarynyń azamattary júgindi. M. Ábilqasymova birde-bir ótinishtiń nazardan tys qalmaıtynyn, azamattar kótergen barlyq máseleler jeke baqylaýyna alynyp, zańnama normalary men belgilengen merzimder saqtala otyryp oryndalatynyn atap ótti.

2021 jyly Agenttikke azamattardan shamamen 21,8 myń ótinish kelip tústi, barlyq ótinishtiń 72,5%-y bank sektoryna tıesili. Mıkroqarjylyq qyzmetti júzege asyratyn uıymdar qyzmetiniń máseleleri boıynsha ótinishter qaralǵan ótinishterdiń jalpy sanynyń 8,3%-yn, saqtandyrý naryǵynyń sýbektileri jáne kollektorlyq agenttikter qyzmetiniń máseleleri boıynsha ótinishter 2,4%-yn quraıdy. Qaralǵan ótinishterdiń jalpy sanynyń 14,4%-y basqa uıymdarǵa tıesili.

2022 jyldyń basynan beri azamattardan shamamen 1,6 myń ótinish kelip tústi, qaralǵan ótinishterdiń jalpy sanynyń 77,0%-y bank sektory, 11%-y mıkroqarjylyq qyzmetti júzege asyratyn uıymdar, 3%-y saqtandyrý naryǵynyń sýbektileri, 3%-y kollektorlyq agenttikter, sondaı-aq 6%-y ózge uıymdar qyzmetiniń máseleleri boıynsha.

Agenttik jasalǵan banktik qaryz sharttarynyń talaptaryn ózgertýge qaryz alýshylardan kelip túsken jáne bankter qaraǵan ótinishter boıynsha statıstıkalyq derekterdi jınaýdy jáne jınaqtaýdy júzege asyrdy. Derekterge sáıkes, 2022 jylǵy qańtarda bankterge merzimi ótken bereshekti óteý máselesi boıynsha 11 617 qaryz alýshy júgingen, onyń ishinde 5 891 qaryz alýshyǵa jasalǵan banktik qaryz shartynyń talaptaryna ózgerister maquldandy. 7 025 qaryz alýshy boıynsha bankter jalpy somasy 12,05 mlrd teńgege qaryz merzimin ózgerte otyryp negizgi borysh jáne (nemese) syıaqy boıynsha tólemdi keıinge qaldyrýdy maquldady.

Qarjylyq qyzmetter kórsetý máseleleri boıynsha konsýltatsııalar berý jáne quqyqtyq kómek kórsetý, sondaı-aq problemalyq qaryzdar boıynsha usynystar ázirleý maqsatynda Agenttik 2021 jyly 722 sot otyrysyna, 2022 jyldyń basynan beri 56 sot otyrysyna qatysty, onyń ishinde sheshimderdiń 80%-dan astamy qaryz alýshylardyń paıdasyna shyǵaryldy.

2021 jyly Agenttik 238-den astam kezdesý uıymdastyrdy, onda 2 543 azamat qabyldandy, 2022 jyldyń basynan 113 azamatpen 7 kezdesý uıymdastyryldy.

Halyqpen jedel ózara is-qımyl jasaý úshin Agenttikte call-ortalyq jumys isteıdi. 2021 jyly sall-ortalyqqa 5,8 myńnan astam azamattan qońyraýlar tústi, 2022 jyldyń basynan beri 2,8 myńǵa jýyq azamat qońyraý shaldy.