Mádına Ábilqasymova 200 teńgelik monetany shyǵarýdyń qajettigin túsindirdi
NUR-SULTAN. QazAqparat – Ulttyq bank tóraǵasynyń orynbasary Mádına Ábilqasymova 200 teńgelik monetany shyǵarýdyń qajettigin túsindirdi, dep habarlaıdy QazAqparat tilshisi.
«Eń aldymen, bul aqsha kýpıýralarynyń eskirip bara jatýymen baılanysty. Sonymen birge, bunyń bári tozyp qalǵan kýpıýralardy aýystyrý úshin qolǵa alynǵan sharýa. 200 teńgelik kýpıýra eń kóp qoldanylady ári qolma-qol aınalymda eń kóp kezdesedi. Qoldanystan jyldam shyǵyp qalmaýy úshin moneta shyǵarý týraly sheshim qabyldandy», - dedi Mádına Ábilqasymova Senat otyrysynan keıin tilshilerdiń suraǵyna bergen jaýabynda.
Ulttyq bank tóraǵasynyń orynbasary jýyq arada basqa monetalardy shyǵarý kózdelip otyrmaǵanyn aıtyp ótti.
Eske sala ketsek, 2020 jyly Ulttyq bank 200 teńgelik monetalardy shyǵarýdy josparlap otyrǵany jýyrda habarlanǵan bolatyn. Tómengi nomınaldy aqshalardyń qyzmet etý merzimin ulǵaıtý úshin osyndaı sheshim qabyldanǵan. 200 teńgelik banknottar aldaǵy 1-1,5 jylda qoldanystan alynady. Ázirge 200 teńgelik nomınaldy banknottar zańdy tólem retinde paıdalanyla beredi.
