Mádına 2013 jyly ıslam mádenıetiniń astanasy atandy
ASTANA. 15 qańtar. QazAqparat - «Mádına 2013 jyly ıslam mádenıetiniń astanasy atandy. Bul jaıynda Arab News arnaıy habar taratty. Mádına basshysy, hanzada Abdýlazız bın Majıdtiń (Abdul-Aziz bin Majed) aıtýynsha, osyǵan baılanysty qańtardyń 20-nan bastap, jyl boıy ótetin sharalardyń baǵdarlamasy ázirlengen», - dep jazady muslim.kz saıty.
Osy ýaqytqa deıin Rabat, Isfahan, Dakar, Aleksandrııa jáne ózge qalalar ıslam mádenıetiniń astanasy atanǵan bolatyn. 2003 jyly Mekke shahary ıslam mádenıetiniń astanasy retinde jarııalanǵan edi. Al aǵymdaǵy jylǵa oraı, Mádına qalalyq ákimshiligi shahardyń baı mádenıetinen habar beretin túrli konferentsııalar, semınarlar uıymdastyrýdy kózdep otyr. «Bul sharalarǵa álemniń túkpir-túkpirinen aıtýly tulǵalar qatysady. Olar Mádınanyń tól mádenıetimen, turmys-tirshiligimen tanysady»,- dep málimdedi ákim. Sonymen qatar, bıyl Mádınadaǵy Paıǵambarymyzdyń (s.a.s.) meshiti keńeıtiletin bolady.
Osy rette Hanzada qala halqyn saltanatty sharalardyń oıdaǵydaı ótýine qolǵabys etýge shaqyrdy. Sondaı-aq, ol keıinnen paıda bolǵan BAQ-tyń, áleýmettik saıttardyń arheologtar men jazýshylardyń konferentsııalary sekildi Mádınada ótetin mádenı sharalardy nasıhattaýdaǵy roline toqtaldy.
