Mádiǵalı Qarsybekov: Short-trekshilerimizdiń medalǵa talasýǵa múmkindigi jetedi

PHENChHAN. QazAqparat - Ońtústik Koreıanyń Phenchhan qalasynda ótetin Olımpıada oıyndaryna qatysatyn short-trekshilerdiń bas bapkeri Mádiǵalı Qarsybekov óz shákirtterine senimdi ekenin aıtty, dep habarlaıdy QazAqparat tilshisi.

- Madyǵalı Abdyǵalıuly, ózińiz baptap jatqan shákirtterińiz týraly aıtyp berseńiz. Olımpıadada qandaı kórsetkishterge qol jetkizýdi josparlap otyrsyzdar?

- Meniń shákirtterim jarysqa tolyqtaı daıyn. Biz kóp eńbektendik. Endi jemisin kórýge sanaýly ýaqyttar qaldy. Olımpıadada bizdiń short-trekshilerimizdiń medal úshin talasýǵa tolyq múmkindigi bar. Ár sportshynyń armany - Olımpıada júldesi. Bizde Phenchhanǵa sol armanmen keldik. Armanymyz oryndalsa, qazaq eli  úshin úlken toı bolar edi.

- Qazir sizder Olımpıada oıyndary ótetin muz saraıynda jattyǵyp jatyr ekensizder. Muz aıdyny kóńilderińizden shyqty ma?

- Muz aıdyny óte keremet jasalǵan. Bizge unady. Ózge muz saraılarynda kóp jaǵdaıda sportshylar syrǵanap kelip, burylystarǵa kelgende súrinip, belgilengen syzyqtardan shyǵyp ketip jatady. Al myna Koreıadaǵy muz alańynda ondaı olqylyqtar bolmaıtyn tárizdi. Sportshylarymyz óte yńǵaıly dep jatyr.

- Ózińiz kimderge senim artyp otyrsyz? Short-trekshilerimiz medal úshin talasýǵa qanshalyqty qaýqarly?

- Short-trekte anaý-mynaý medal alady dep aıtý óte qıyn. Kimniń baǵy janyp tur, sol medal alady. Sochıde medalǵa synyq súıem jetpeı qalǵan bolatynbyz. Bul joly sol olqylyqtyń ornyn toltyrýǵa tyrysamyz.

- Short-trekshilerimiz úshin basty jarys estafeta ekeni anyq. Bul synda kimder saıysqa túsedi?

- Erler quramasynda estafetada Abzal Ajǵalıev, Denıs Nıkısha jáne Nurbergen Jumaǵazıev óner kórsetetin bolady. Bul sportshylar qazirgi tańdaǵy Qazaqstan short-trekshileriniń ishindegi eń úzdikteri. Al qyzdar arasynda Álııa Kım men Anastasııa Krestova syndy sportshylarymyz bar. Solarǵa úlken úmit artyp otyrmyz.

- Áńgimeńizge rahmet! sáttilik joldas bolsyn...