Mádiǵalı Qarsybekov: Alpaýyt elder bizdiń sportshylardan qaımyǵa bastady
ASTANA. QazAqparat - Búgin Astanada short-trekten Qazaqstan quramasynyń bas jattyqtyrýshysy Mádiǵalı Qarsybekovtiń qatysýymen baspasóz otyrysy ótti, dep habarlaıdy QazAqparat tilshisi.
Onda Qazaqstandaǵy short-trek sportynyń bıylǵy tarıhı jeńisteri sóz bolyp, aldaǵy josparlar týraly tilshilerdiń suraqtaryna jaýap berildi. Otyrys barysynda bas jattyqtyrýshy Qarsybekov: «2016 jyldyń aıaǵy biz úshin, qazaq short-tregi úshin óte tabysty boldy. Ózderińiz kórgendeı short-trekshilerimiz Álem kýbogy kezeńderinde ártúrli dárejede birneshe medal syılady. Bul - buryn-sońdy bolmaǵan jetistik. Ońtústik Koreıa, Gollandııa, AQSh, Kanada, Reseı sııaqty osy sport túriniń alpaýyttary bizdiń sportshylarmen sanasyp, olardan qaımyǵa bastady. Odan basqa bizdiń sportshylar osy maýsymdaǵy álemdik short-trektiń top-paraǵyn (reıtıngin) bastap tur. Mundaı jaǵdaı qashan bolyp edi?» - dedi.
Sondaı-aq, bul qajyrly eńbektiń nátıjesi ekenin basa aıtty bas jattyqtyrýshy.
«Otandyq short-trekshilerdiń aty-jóni jurttyń aýzynda júr. Eń bastysy, bul jeńistiń sebepkeri - Qazaqstan quramasynyń qajyrly eńbeginiń jemisi. Kóptegen qıyndyqtarǵa qaramastan, biz osydan 20 jyl buryn Qazaqstanda short-trek sportyn qolǵa aldyq. Onyń tabandylyǵy, qaısarlyǵy, erik-jigeri men talpynysy arqasynda qazaqstandyq sportshylar óz jemisin kórsete bastady», - dep atap ótti Qarsybekov.
Bas jattyqtyrýshy alda Almaty tórinde ótetin 28-shi Qysqy Dúnıejúzilik stýdentter oıynyna qatysatyndaryn, qazir ulttyq qurama Gollandııaǵa jattyǵýǵa ketkenin de atap ótti.
Esterińizge sala keteıik, bıyl qazaqstandyq short-trekshilerimiz álem kýbogynyń tórt kezeńine qatysty.
Álem kýbogynyń 1-shi kezeńi Kanadada ótti. Onda500 metrden erler arasynda -Abzal Ájiǵalıev pen Denıs Nıkısha 4- oryndy, 1000 metrde áıelder arasynan Kım Iong 10-oryndy ıelendi.
Eknishi kezeń AQSh-ta ótti. Onda 500 metrden erler arasynda Abzal Ájiǵalıev bas júldeni jeńip aldy. Al Aıdar Bekjanov 13-orynǵa, Denıs Nıkısha 18-orynǵa taban tiredi.
1500 metrden Nurbergen Jumaǵazıev 9-orynǵa taban tiredi. Al osy kezeńde 5 myń metrlik estafetalyq jarysta erler quramasy qola júldeger atandy.
Álem kýbogynyń 3-kezeńi Qytaıda ótti. Onda 500 metrden Abzal Ájiǵalıev tórtinshi, Aıdar Bekjanov besinshi orynnan kórindi. 1000 metr qashyqtyqta Nurbergen Jumaǵazıev 6-orynǵa turaqtady.
Álem kýbogynyń 4-kezeńi Ońtústik Koreıada ótti. Onda 1000 metrden Nurbergen Jumaǵazıev chempıon atansa, Denıs Nıkısha kúmis júldeni qanjyǵasyna baılady.
Tórt kezeńniń qorytyndysy boıynsha Qazaqstan quramasy álemdik reıtıngte 6-orynda keledi.
