Mádı Takıev: Jańa Salyq kodeksin kezeń-kezeńimen engizý qarastyrylǵan
ASTANA. KAZINFORM – Jańa Salyq kodeksiniń shaǵyn jáne orta bıznes qyzmetine teris áserin azaıtý maqsatynda ońaılatylǵan deklaratsııa negizindegi arnaıy salyq rejımin qoldanýǵa salynatyn basy artyq shekteýlerdi alyp tastaý týraly sheshim qabyldandy. Tyıym salynǵan tizimde, qoldanystaǵy zańnamadaǵydaı, tek 44 qyzmet túri saqtalady. Bul týraly Úkimettiń baspasóz qyzmeti habarlady.
— Prezıdenttiń tapsyrmasy boıynsha Úkimet aǵymdaǵy ekonomıkalyq reformalar aıasynda birqatar shara ázirledi. Sonyń ishinde salyqtyq ákimshilendirý boıynsha ońaılatylǵan deklaratsııa negizindegi arnaıy salyq rejımin qoldaý úshin tek 44 qyzmet túrin ǵana tyıym salynǵan tizimde qaldyryldy.
Sondaı-aq 2026 jylǵy 1 qańtardan bastap salyqtyq ákimshilendirý «taza paraqtan» júrgiziledi. Bul mıkro jáne shaǵyn bızneske qatysty kelesi jaıttardy kózdeıdi: kameraldyq baqylaý alynyp tastalady, salyqtyq tekserýler júrgizilmeıdi, sot organdaryna tirkeýdi, qaıta tirkeýdi jaramsyz dep taný týraly talap-aryz berý toqtatylady. Salyqtar men tólemder boıynsha salynǵan ósimpuldar men aıyppuldar 2026 jyldyń 1 sáýirine deıin negizgi qaryz ótelgen jaǵdaıda joıylady. QQS boıynsha esepke qoıý sheginen asyp ketken salyq tóleýshiler ákimshilik jaýapkershilikke tartylmaıdy.
Sondaı-aq salyq tóleýshiler úshin salyq jáne ádilet organdarynda kameraldyq jáne salyqtyq tekserýler júrgizbeı-aq, ońaılatylǵan tártippen esepten shyǵarý naýqany ótkiziledi. Bul jańa Salyq kodeksin kezeń-kezeńimen engizýge jáne salyq tóleýshiler úshin salyqtyq ákimshilendirýdi jeńildetýge múmkindik beredi, — dedi Qarjy mınıstri.
Aıta ketelik Prezıdent tapsyrmasy boıynsha Úkimet makroekonomıkalyq turaqtylyqty qamtamasyz etý jáne ekonomıkalyq reformalardyń teris saldaryn barynsha azaıtý baǵytynda sharalar qabyldap jatyr.