Mádı Tákıev respýblıkalyq bıýdjet túsiminiń oryndalýyna kedergi bolǵan faktorlardy atady

ASTANA. KAZINFORM — Bıyl 9 aıda memlekettik bıýdjet kiristeri 17,3 trln teńgeni qurady. Bul týraly Úkimet otyrysynda Qarjy mınıstri Mádı Tákıev aıtty.

- Osy jyldyń 9 aıynyń qorytyndysy boıynsha memlekettik qarjynyń kórsetkishteri tómendegideı qalyptasty. Memlekettik bıýdjettiń kirister kólemi 17,3 trln teńgeni qurap, jospar 102 paıyz oryndaldy. Ótken jylmen salystyrǵanda ósim qarqyny 116 paıyzǵa jetip, 2,4 trln teńgeni qurady. Onyń ishinde respýblıkalyq bıýdjettiń túsim kólemi 10,5 trln teńgeni qurap, jospar 97,3 paıyz oryndaldy. Ósim qarqyny ótken jylmen salystyrǵanda shamamen 1,4 trln teńgege nemese 116 paıyz jetti, - dedi Mádı Tákıev.

Osy oraıda mınıstr bıýdjet túsimi josparynyń oryndalmaýynyń mynadaı negizgi faktorlaryn atady:

• álemdik munaı baǵasynyń qubylmalylyǵy;
• bıznestiń logıstıkalyq shyǵystaryna áser etetin, turaqsyz geosaıası jaǵdaıdyń jalǵasýy. 

Bul, óz kezeginde, eksport kóleminiń 5,1 paıyz tómendeýinde jáne saldarynan, bıznesten túsetin salyq túsimderiniń azaıýyna alyp keldi.

- Jergilikti bıýdjet kiristeri kólemi syrtqy faktorlarǵa táýelsiz salyqtar esebinen 6,8 trln teńgeni qurady. Jospar 704 mlrd teńgege artyǵymen oryndaldy. Salyq jáne kedendik ákimshilendirý aıasynda 653 mlrd teńgege qosymsha rezervter qamtamasyz etildi. Bıyl 9 aıda eksporttaýshylarǵa jalpy somasy 1 trln teńgege jýyq qosylǵan qun salyǵy qaıtaryldy. Nátıjesinde ekonomıkaǵa naqty ótimdi qarajattyń túsimi qamtamasyz etiledi, - dedi ol.

Aıta keteıik, Úkimet otyrysynda 2025 jylǵy qańtar-qyrkúıek aılaryndaǵy áleýmettik-ekonomıkalyq damý qorytyndylary men respýblıkalyq bıýdjettiń atqarylý barysy talqyǵa salynyp jatyr.