Mádı Takıev Qarjy mınıstrligin basqara beredi
ASTANA. KAZINFORM — Mádı Takıev Qazaqstan Respýblıkasynyń Qarjy mınıstri laýazymyna taǵaıyndaldy.
Tıisti Jarlyqqa Prezıdent Qasym-Jomart Toqaev qol qoıdy.
— Mádı Tókeshuly Takıev Qazaqstan Respýblıkasynyń Qarjy mınıstri laýazymyna taǵaıyndalsyn, — delingen qujatta.
Mádı Takıev 1978 jyly Almaty oblysynda dúnıege kelgen.
Qazaq memlekettik basqarý akademııasyn, D. Qonaev atyndaǵy gýmanıtarlyq ýnıversıtetin, Halyqaralyq bıznes ýnıversıtetin bitirgen.
Eńbek jolyn 1998 jyly QR Ǵylym mınıstrligi — Ǵylym akademııasynyń Memleket jáne quqyq ınstıtýtynda bas esepshisi bolyp bastaǵan.
2000–2008 jyldary — Almaty qalasy boıynsha Salyq komıtetiniń ınspektory, jetekshisi, bas salyq ınspektory, ShKS jumysy jáne aýdıt jónindegi bólimderdiń basshysy.
2008–2009 jyldary — Almaty oblysy boıynsha Salyq departamentiniń Aktsızderdi ákimshilendirý basqarmasynyń basshysy.
2009–2012 jyldary — Almaty qalasy boıynsha Salyq departamenti basshysynyń orynbasary.
2012–2013 jyldary — QR QM Salyq komıtetiniń basqarma basshysy.
2013–2014 jyldary — QR Ulttyq ekonomıka mınıstrliginiń Salyq jáne keden saıasaty departamentiniń dırektory.
2014 jyly — QR Premer-Mınıstri Keńsesi áleýmettik-ekonomıkalyq bóliminiń bas konsýltanty.
2014–2017 jyldary — Memlekettik kirister departamentiniń Atyraý oblysy boıynsha basshysy.
2017–2019 jyldary — QR Qarjy mınıstrligi Memlekettik kirister komıteti Salyqtyq baqylaý departamentiniń dırektory.
2019–2020 jyldary — QR ulttyq ekonomıka vıtse-mınıstri.
2020–2023 jyldary — QR Prezıdenti Ákimshiligi Áleýmettik-ekonomıkalyq monıtorıng bóliminiń meńgerýshisi.
2023–2024 jyldary — VII saılanǵan QR Parlamenti Májilisiniń depýtaty, QR Parlamenti Májilisiniń Qarjy jáne bıýdjet komıtetiniń tóraǵasy, QR Parlamenti Májilisindegi «AMANAT» partııasy fraktsııasynyń múshesi.
2024 jylǵy 6 aqpannan bastap Qazaqstan Respýblıkasy qarjy mınıstri qyzmetin atqardy.
Eske salaıyq, buǵan deıin Dáýren Qosanov Qorǵanys mınıstri, Erjan Sádenov Іshki ister mınıstri, Ǵalymjan Qoıshybaev Premer-mınıstrdiń orynbasary — Úkimet Apparatynyń basshysy, Serik Jumanǵarın Premer-mınıstrdiń orynbasary — Ulttyq ekonomıka mınıstri, Jaslan Mádıev Jasandy ıntellekt jáne tsıfrlyq damý mınıstri, Nurlybek Nálibaev Premer-mınıstrdiń birinshi orynbasary, Qanat Bozymbaev Premer-mınıstrdiń orynbasary laýazymyna taǵaıyndalǵanyn habarlaǵanbyz.
