1 aıda 10 mln teńgeden astam syıaqy: Bilim salasynda zań buzýshylyqtar anyqtaldy
ASTANA. KAZINFORM — Aýdandyq bilim bólimderiniń birinde qyzmetkerlerge 1 aıda 10 mln teńgeden astam syıaqy aýdarylǵan. Bul týraly búgin Úkimet otyrysynda Qarjy mınıstri Mádı Tákıev aıtty.
- Tsıfrlyq transformatsııa aıasynda bıýdjettik onlaın monıtorıng engizildi. Ol bıýdjet qarajatynyń jumsalýyna baqylaýdy kúsheıtýge baǵyttalǵan. Qazirgi ýaqytta bilim berý salasynyń ózinde qarajatty jumsaý kezindegi buzýshylyqtardyń aldyn alý jáne táýekelderdi anyqtaýda aıtarlyqtaı oń nátıjeler bar. Jasandy ıntellekt elementterin qoldaný arqasynda táýekeldi tólemderiniń somasy 2024 jyly 307 mlrd teńgege jáne 2025 jyly 132 mlrd teńgege anyqtaldy, - dedi mınıstr.
Máselen, onyń dereginshe, aýdandyq bilim bólimderiniń qyzmetkerlerine bir aıda 65 mln teńgege deıin tólem jasalǵan nemese 10 mln teńgeden astam syıaqy aýdarylǵan.
- Taǵy bir mysal, bir shot nemese bir jeke sáıkestendirý nómirin kórsete otyryp, ár túrli adamdardyń aty-jónimen aıyna 66 tólem jasalǵan. Sonymen qatar, monıtorıng júıesi keńeıip keledi. Ol tek bilim berý salasyn ǵana emes, sonymen birge densaýlyq saqtaý, mádenıet, týrızm jáne sport salalaryn da qamtydy, - dedi Mádı Tákıev.
Aıta keteıik, Úkimet otyrysynda 2025 jylǵy qańtar-qyrkúıek aılaryndaǵy áleýmettik-ekonomıkalyq damý qorytyndylary men respýblıkalyq bıýdjettiń atqarylý barysy talqyǵa salyndy.