Mádı Manatbek «Qazaq radıolary» JShS basshylyǵynan ketti
«Búginnen bastap «Qazaq radıolarynyń» JShS bas dırektory qyzmetimdi aıaqtap, «Qazaqstan» respýblıkalyq teleradıokorporatsııasy jáne «Qazaq radıosy», «Shalqar» ulttyq arnasy, «Astana», «Klassık» radıolaryn bir arnaǵa toǵystyrǵan seriktestik ujymymen qoshtasyp jatyrmyn. Byltyr kompanııa tizginin qolǵa alǵanda ǵasyrǵa jýyq tarıhy bar qasıetti qara shańyraqtaǵy altyn áriptesterimmen keńesip, «Qazaq radıolarynyń» aldaǵy baǵyt-baǵdaryn, ulttyq ustanymyn birlese aıqyndap, áleýmettik-qoǵamdyq máselelerge basa nazar aýdarýǵa kelistik. Qazir sol ustanymǵa saı qyzmet etip kele jatqan, búgin qımastyqpen shyǵaryp salǵan «Qazaq radıolarynyń» ujymyna shyn júrekten alǵys aıtam», - dep jazdy M. Manatbek áleýmettik jelidegi paraqshasynda.
Sonymen birge, Mádı Manatbek seriktestik jetekshiligin senip tapsyrǵan QR Aqparat jáne kommýnıkatsııalar mınıstri Dáýren Abaev pen «Qazaqstan» RTRK AQ Basqarma tóraǵasy Erlan Qarınge alǵys aıtty.
«Memlekettik telearna jáne merzimdi basylymdarda jetekshilik etken men úshin «Qazaq radıolary» úlken mektep boldy. Endi tolyq medıa menedjermin», - dep jazdy ol.
Mádı Manatbek 1978 jyly 25 mamyrda dúnıege kelgen. 2006 jyly Kókshetaý ýnıversıtetinde zańger mamandyǵyn meńgergen. Eńbek jolyn 1998 jyly respýblıkalyq «Nartáýekel» gazetinde tilshilik qyzmetten bastaǵan. Eńbek joly 1999 jyly qalalyq «Shymkent kelbeti» gazetinde jalǵasty. 2000 jyldan bastap «Otyrar» telearnasynda jańalyqtar júrgizýshisi, tańǵy «Nurly araı», sporttyq «Topjarǵan», qylmystyq «Ekstrennyı vyzov» baǵdarlamalarynyń avtory ári júrgizýshisi boldy. 2001-2006 jyldary «Astana» telearnasynda jańalyqtar júrgizýshisi, aptalyq aqparattyq-saraptamalyq «Úsh shırek», «Ashyq áńgime», sporttyq «Topjarǵan», qylmystyq «Oqıǵa izimen» baǵdarlamalarynyń avtory ári júrgizýshisi jáne baǵdarlamalar óndirisi qyzmetiniń jetekshisi boldy.
2006 jyly «31 arna» Astana qosynynyń tilshisi, 2007 jyly «MARMILAT» jarnama agenttiginiń dırektory.
2008 jyly «Habar» Agenttigi» AQ jańalyqtar qyzmetiniń júrgizýshisi. 2010-2013 jyl aralyǵynda «Qazaqstan» RTRK» AQ aptalyq aqparattyq-saraptamalyq «Apta.kz» baǵdarlamasynyń júrgizýshisi; qoǵamdyq-saıası baǵdarlamalar bóliminiń jetekshisi, «Qazaqstan» RTRK» AQ Basqarma tóraǵasynyń orynbasary qyzmetterin atqardy. 2013 -2017 jyldary «BAQORDA media group» JShS Bas dırektory. 2017 jyldyń aqpanynan búginge deıin «Respýblıkalyq radıo» JShS bas dırektory boldy.
