Mádı Kateshov Búkilálemdik jaǵajaı oıyndaryna joldama aldy

NUR-SULTAN. QazAqparat - Ulttyq Olımpıada komıtetteri qaýymdastyǵy Búkilálemdik jaǵajaı oıyndaryna joldama alǵan qazaqstandyq karateshiniń esimin atady, dep habarlaıdy QazAqparat.

QR Ulttyq olımpıada komıteti habarlaǵandaı, 2019 jyldyń qazan aıynda Katarda ótetin ANOC World Beach Games oıyndarynda Qazaqstannyń namysyn Mádı Kateshov qorǵamaq.

«Mádı Kateshov - karateden Qazaqstannyń birneshe dúrkin chempıony, Azııa chempıonatynyń júldegeri, Tokıo-2020 reıtınginde 16-shy orynda tur. Mádı byltyr Madrıdte ótken álem chempıonatynda jaǵajaı oıyndaryna qajetti upaıdy jınap úlgergen. Ol álemdik synda shırek fınalǵa deıin jetip, venesýelalyq sportshyǵa ese jibergen bolatyn», - dep jazdy QR Ulttyq olımpıada komıtetiniń resmı saıty.

Aıta keteıik, ANOC World Beach Games dodasynda 16 sport túrinen júlde taratylady. Olardyń qatarynda kúres, karate, jaǵajaı voleıboly, jaǵajaı gandboly, jaǵadaı tennısi, ashyq sýda júzý jáne taǵy basqa sport túrleri bar.