Mádı Ahmetov stýdentter jataqhanasyna qatysty birqatar usynys aıtty
«Elimizdegi jastardyń basym bóligin stýdentter quraıdy. Aldaǵy jyldarda demografııalyq boljamdarǵa saı jastar sanynyń ósetinin eskersek, joǵary oqý oryndaryndaǵy ınfraqurylymdy jańartý kún tártibindegi ózekti de ótkir másele ekeni anyq. Stýdentterdiń turýyna qolaıly jaǵdaı jasamaı, olardyń birinshi qajettilikterin qamtamasyz etpeı, bilim sapasyn arttyrý múmkin emes. Qazirgi tańda 129 joǵary oqý orny men 795 kásiptik bilim berý mekemesinde 1 mln-nan astam stýdent bilim alyp jatyr. Olardyń 175 myńy ǵana jataqhanamen qamtamasyz etilgen. Sondaı-aq, elimizde 80 myńnan astam stýdentke jataqhana jetispeıdi. Atalǵan máseleni sheshý maqsatynda 2018 jyldyń naýryz aıynda Elbasynyń «Bes áleýmettik bastamasy» atty halyqqa úndeýi jarııalandy. Áleýmettik bastamanyń úshinshi baǵyty «Joǵary bilim alýdyń qoljetimdiligi men sapasyn arttyryp, stýdent jastardyń jataqhanadaǵy jaǵdaıyn jaqsartýdy» kózdeıdi», - dedi M. Ahmetov Úkimet basshysy Asqar Mamınniń atyna joldaǵan depýtattyq saýalynda.
Onyń aıtýynsha, baǵdarlama aıasynda Bilim jáne ǵylym mınıstrligine 2022 jyldyń sońyna deıin stýdentterge arnap 75 myń oryndyq 184 jańa jataqhana salý tapsyrylǵan. Baǵdarlamany júzege asyrý úshin memlekettik bıýdjet esebinen 118 mlrd tenge qarjy qarastyrylǵan. Áleýmettik bastama josparǵa saı júzege asatyn bolsa, jataqhanaǵa muqtaj stýdentterdiń 85 paıyzy orynmen qamtamasyz etiledi. «Qarjy ortalyǵy» aktsıonerlik qoǵamynyń aqparaty boıynsha sońǵy 2 jylda el aýmaǵynda 20 266 oryndyq 75 jataqhana paıdalanýǵa berilgen. Bul jalpy kórsetkishtiń tek 27 paıyzy. Paıdalanýǵa berilgen jataqhanalardyń tek 39-y jańadan boı kóterse, qalǵan 36-sy rekonstrýktsııadan ótken.
«Negizinde memlekettik bıýdjetten qarastyrylǵan qarjy jańa jataqhanalardyń qurylysyna josparlanǵanyn eskerý qajet. Aımaqtarǵa keletin bolsaq, bastama árkelki júzege asýda. Ásirese, ctýdentter úıiniń eń úlken jetispeýshiligi nemese 56 paıyzy Nur-Sultan jáne Almaty qalalaryna tıesili. Sondyqtan memlekettik baǵdarlamany sapaly oryndaý bul aımaqtarǵa asa mańyzdy», - dedi ol.
Sondyqtan, tapsyrmany júıeli ári ýaqytynda oryndaý úshin birqatar usynys jasaldy:
1. Bilim jáne ǵylym mınıstrligine qarasty «Qarjy ortalyǵynyń» ınvestorlarǵa usynyp otyrǵan sharttaryn qaıta qarastyrýy mańyzdy.
2. Jataqhanalardy salýdaǵy barlyq jaýapty memlekettik organdardyń jumysyn júıelendirip, ortaq úılestirý máselesin tez arada sheshý kerek.
3. «Gosekspertıza» mekemesine «Bes áleýmettik bastama» aıasynda salynatyn jataqhana qurylysynyń jobasyn qarastyrý merzimin qysqartý usynysy.
4. Kelisimsharttardy jasaý, sondaı-aq memlekettik organdar arasyndaǵy bıýrokratııalyq protsedýralardy jeńildetý joldaryn qarastyrý ózekti.
5. Memlekettik bilim berý grantyn ornalastyrý barysynda joǵary oqý oryndary men kolledjderge stýdenttik jataqhananyń mindetti bolýy jónindegi qoıylatyn lıtsenzııalyq talaptardy engizý qajet.
6. Jataqhanalardy salatyn merdiger kompanııalarǵa ár stýdent úshin jataqhanadaǵy ornyna tólenetin aılyq tólemaqysynyń qunyn ósirmeýdi kelisimshartta kórsetý mańyzdy.
