Mádı Ahmetov «Serpin-2050» baǵdarlamasynyń qarqyny báseńdep bara jatqanyn aıtty
«Nur Otan» partııasynyń «Ózgerister joly: ár azamatqa laıyqty ómir» saılaýaldy baǵdarlamasynda jas mamandardy qoldaýǵa, jańa jumys oryndarymen qamtamasyz etýge basymdyq berilgen. Osy baǵytta Elbasynyń tapsyrmasyna sáıkes 2014 jyldan bastap ońtústik túlekteriniń soltústik aımaqtarda tegin bilim alýyna jáne ishki kóshi-qondy retteýge, jumys kúshi tapshylyǵyn azaıtýǵa baǵyttalǵan «Serpin-2050» memlekettik baǵdarlamasy iske asyrylyp jatyr. Áleýmettik joba aıasynda kadrlardy daıarlaý elimizdiń 25 joǵary oqý ornynyń bazasynda júrgizilýde. Osydan 7 jyl buryn úlken qarqynmen bastaý alǵan baǵdarlama jyl ótken saıyn báseńdep, mektep bitirýshi túlekterdiń oǵan degen qyzyǵýshylyǵy tómendeýde. Sońǵy 6 jylda «Serpin-2050» baǵdarlamasyn júzege asyrýǵa memlekettik bıýdjet esebinen bólingen 25,7 mlrd teńge qarjynyń jumsalý tıimdiligi eshqandaı syn kótermeıdi. Ýaqytyly qarjylandyrýǵa qaramastan, turaqty jumys, úı máselesi áli kúnge deıin sheshimin tappaǵan. Eń ókinishtisi, baǵdarlama túlekteriniń tek tórtten bir bóligi bilim alǵan aımaqtarda turaqtalǵan. Mysaly, Pavlodar qalasyna 2018 jyly oqýǵa túsken stýdentterdiń 70% ońtústik aımaqqa qaıta oralǵan», - dedi M. Ahmetov Májilistiń jalpy otyrysynda.
Osy oraıda ol Soltústik Qazaqstan oblysyndaǵy jaǵdaıǵa toqtaldy.
«Osydan on kún buryn Soltústikke baryp, jaǵdaıdy baǵamdap, «baıaǵy jartas, sol jartas» ekenin, naqty nátıjeniń joqtyǵyna kózim jetti. «Serpin» boıynsha Qozybaev atyndaǵy Soltústik Qazaqstan ýnıversıtetin bıyl bitirgen 237 túlektiń tek 31-i ǵana turaqty jumyspen qamtylǵan. Al qalǵan 200-den astam maman memleket qoldaýynan tys qalyp otyr. Sonda keler jyly bitiretin 342 jas mamannyń taǵdyry ne bolmaq? Bul eńbek naryǵyndaǵy mamandar qajettiligi men kadr daıarlaý isi arasynda eshqandaı baılanys joq ekeniniń aıqyn dáleli. Baǵdarlamany júzege asyrý boıynsha bar jaýapkershilik tek aımaqtyq ýnıversıtetterdiń moınyna júktelgen. JOO-nyń negizgi mıssııasy kadrdy daıarlap shyǵarý. Jumyspen qamtý, qolaıly jaǵdaı jasaý jergilikti atqarýshy bıliktiń mindeti. Joba jumyssyzdar sanyn azaıtýdyń ornyna orta joldan oqýyn tastap, týǵan ólkesine oralǵan NEET sanatyndaǵy jastardyń sanyn kóbeıtýde. Osynyń barlyǵyn kóre otyryp, Bilim jáne ǵylym mınıstrligi eshqandaı saraptama júrgizbesten 2021-2023 jyldarǵa baǵdarlamany júzege asyrýǵa bıýdjetten 32,7 mlrd teńge jumsaýdy qarastyryp otyr. Eger joba aldaǵy ýaqytta esh ózgerissiz júzege asatyn bolsa, bul memleket qarjysyn jelge shashýmen teń», - dedi depýtat.
«Eger joba basy bar, aıaǵy joq bastamalar qataryna kirmesin desek, kesh bolmaı turǵanda «Serpin-2050» memlekettik baǵdarlamasynyń bolashaǵyn aıqyndap, baǵyt mindetterin júıelep, jetildirip, is júzinde nátıje beretin, jastarǵa qolaıly mehanızm jasaqtaý qajet», - dedi Mádı Ahmetov.
Bul turǵyda naqty usynystar jasaldy:
- «Serpin» túlekterine tek oqyǵan aımaǵynda emes, kórshiles jatqan eldi mekenderde jumys isteýin oılastyrǵan jón;
- Jas mamandarǵa arnap bastapqy kezeńde aqysy tómen, tym bolmaǵanda jataqhanamen qamtamasyz etý qajet;
- Jas maman soltústik aımaqta otbasyn qurǵan jaǵdaıda oǵan jergilikti ákimshilikten kóterme járdemaqy taǵaıyndaý kerek;
- 3 jyldyq eńbek ótemi aıaqtalǵan soń qolaıly shartpen qoljetimdi baspanaly bolýyn oılastyrý mańyzdy.