Mádı Ahmetov Almaty akademııasynyń ujymymen kezdesti

ALMATY. QazAqparat - Parlament Májilisiniń depýtaty Mádı Ahmetov Qazaqstan Respýblıkasy ІІM M.Esbolatov atyndaǵy Almaty akademııasynyń professorlyq-oqytýshy quramy jáne tyńdaýshylarmen kezdesip, oqý ornynyń tynys-tirshiligimen tanysty, dep habarlaıdy QazAqparat tilshisi.

Akademııa basshysynyń orynbasary S.Kenenbaev Májilis depýtatyna jańartylǵan oqý kabınetterin, kompıýterlik synyptardy, akt zalyn kórsetip, tájirıbelik-baǵdarly oqytý baǵdarlamalaryn engizý jónindegi jumystarmen tanystyrdy.

Sondaı-aq, ol bilim ordasyndaǵy kıberortalyqtyqtyń jumysymen jáne general Rústem Qaıdarov atyndaǵy kabınetpen tanysyp, Halyq qaharmany Ǵazız Baıtasovtyń taqtasyna gúl shoǵyn qoıdy.

Mádı Ahmetov akademııa kýrsanttary men tyńdaýshylary turatyn kazarmaǵa da kelip, olardyń turmystyq jaǵdaıymen tanysty.

Qazaqstan Respýblıkasy Parlamenti Májilisiniń depýtaty Almatyda qańtar oqıǵasy kezinde lańkestik áreketterdi toqtatýǵa at salysqan ujymǵa alǵys aıtyp, oqý ornynyń kıberqaýipsizdik salasyndaǵy mamandar men Іshki ister mınıstrliginiń joǵary basshy kadrlaryn daıarlaý jumysynyń mańyzdylyǵyn atap ótti.

Sondaı-aq, Mádı Ahmetov Memleket basshysy alǵa qoıǵan mindetter turǵysynda saılanbaly organnyń qyzmeti, zań shyǵarý bastamalary, áleýmettik kodeksti ázirleý jáne basqa da basym máseleler týraly habardar etti.

Elimizdiń quqyq qorǵaý júıesinde júrgizilip jatqan reformaǵa, sybaılas jemqorlyqqa qarsy kúreske, qyzmet kórsetýdiń jańa úlgisi aıasynda ishki ister organdaryn jańǵyrtýǵa qatysty máseleler týraly oıyn ortaǵa saldy.

Sondaı-aq, jeke quramnyń barlyq ótinishterin tyńdaǵan Májilis depýtaty akademııanyń materıaldyq-tehnıkalyq bazasyn jaqsartýdyń naqty máselelerin sheshýge yqpal etýge, onyń ishinde áleýmettik blok pen jabdyqqa qatysty eń ózektilerin baqylaýǵa alýǵa ýáde berdi.