Madhııa Ýsmanova áıelder kúresinen jasóspirimder arasyndaǵy álem chempıonatynda top jardy

ASTANA. KAZINFORM - Grekııa astanasy Afıny qalasynda ótip jatqan áıelder kúresinen 17 jasqa deıingi jasóspirimder arasynda álem chempıonatynda Madhııa Ýsmanova (57 keli) altyn medal aldy.

Otandasymyz fınalda úndistandyq sportshymen baq synady. Nátıjesinde qarsylasynan basym túsip, jeńis tuǵyryna kóterildi.

Sondaı-aq el quramasynan álem chempıonatynda Іnjý Baqqoja (43 keli) qola júldege qol sozdy.

- Dúbirli dodada Sanııa Soltanǵalı (49 keli), Máken Shynaıy (46 keli), Abdrahmanova Farıda (53 keli), Muqat Jáıdar (61 keli), Saıahmet Nuraıym (65 keli), Daýletjan Shahızada (69 keli) jáne Maqsatqyzy Nurgúl (73 keli) el namysyn qorǵap jatyr, - dep málim etti Qazaqstan kúres federatsııasynan.

Eske salsaq, budan buryn Jańajol Qýanyshbek (45 keli) Grekııa astanasy Afıny qalasynda grek-rım kúresinen 17 jasqa deıingi jasóspirimder arasynda álem chempıonatynda top jardy.

Oǵan qosa el quramasynan Nurdáýlet Kumaruly (48 keli), Asqar Nurálı (55 keli) kúmis júldeger atansa, Dosbol Shamıl (65 keli) qola medal ıesi boldy.

Buǵan deıin Madhııa Ýsmanovanyń áıelder kúresinen jasóspirimder arasyndaǵy álem chempıonatynyń fınalyna shyqqanyn jazǵan edik.