Mádiǵalı Qarsybekov: Short-trekten el chempıonatynyń básekelestigi artyp keledi

ASTANA. KAZINFORM — Short-trekten QR eńbek sińirgen jattyqtyrýshysy Mádiǵalı Qarsybekov Astanada ótip jatqan el chempıonatyna baǵa berdi.

Jattyqtyrýshynyń aıtýynsha, ishki birinshiliktiń deńgeıi kóterilip, sportshylar arasynda básekelestik arta túsken. 

— Burynǵydaı emes, sportshylar arasynda básekelestik óskeni baıqalady. Komandanyń aldyńǵy qatardaǵy úzdikteri barynsha kúsh salyp, óz ornyn saqtap qalýǵa kúsh salýy kerek. Buryn álemdik dodalarǵa kim baratyny belgili bolatyn edi, al qazir kim jeńimpaz bolsa sol barady. El birinshiliginde aldyńǵy alty sportshy ulttyq quramaǵa qabyldanyp, álem kýbogyna qatysady. Osy básekede Olımpıada oıyndarynyń joldamasy sarapqa salynady. Sol sebepti, ishki birinshilik óte qyzǵyndy ótip jatyr, — dedi Qarsybekov.

Ardager jattyqtyrýshy ulttyq quramanyń daıyndyq jaǵdaıy týraly aıtty.

— Jaqyn ýaqytta Olımpıada oıyndaryna daıyndyq bastalady. Shetelden arnaıy ákelgen bapker-mamandar óz kómegin tıgizip jatyr. Komanda jaqsy kele jatyr, kóńil-kúıleri tamasha. Barlyǵynyń maqsaty Olımpıada medalin jeńip alý, — deıdi ol.

Qarsybekovtiń aıtýynsha, elimizde short-trek sportynyń damýyna barlyq jaǵdaı jasalǵan. 

— Jalpy, bizde sportty qarjylandyrý tetigi eýropaǵa qaraǵanda kúrdeli, demeýshiler esebinen qarjylandyrý qarastyrylmaǵan. Alaıda, elimizde álemdik deńgeıdegi jattyǵý bazasy bar. Memleketten jan-jaqty qoldaý arqasynda elimizde short-trek sporty damyp kele jatyr, — dedi bapker.

Eske sala ketsek, Astanada 11-15 qyrkúıek aralyǵynda short-trekten Qazaqstan chempıonaty ótip jatyr.