Mádenıetimiz ben dástúrimizde Altyn ordanyń murasy bar – Dáýren Abaev

NUR-SULTAN. QazAqparat – QR Aqparat jáne qoǵamdyq damý mınıstri Dáýren Abaev Altyn ordanyń 750 jyldyǵyn toılaý týraly pikir bildirdi, dep habarlaıdy QazAqparat tilshisi.

«Qazaq handyǵynyń 550 jyldyǵyn toılaý arqyly biz memlekettigimizdiń týýyn atap óttik. Memlekettik taqyr jerden paıda boldy deýge bolmaıdy. Qazaq etnosy da 550 jyl buryn paıda bolǵan joq. Bedeldi tarıhshylar qazaq halqynyń etnogeneziniń Altyn orda kezeńinde qalyptasqanyn aıtady. Joshy ulysynyń basym bóligi qazirgi Qazaqstannyń aýmaǵynda ornalasqan. Kereı men Jánibekten bastap, Kenesaryǵa deıingi barlyq handarymyz dál altynordalyq Shyńǵys urpaqtarynan taraǵan. Bizdiń mádenıetimiz, ónerimiz ben dástúrimizde Altyn ordanyń murasy bar. Bul anyq. Munda tarıh kókjıegin qoldan keńeıtý joq, kerisinshe tarıhty durys baǵamdaýǵa tyrysyp jatyrmyz», - dedi Dáýren Abaev.

Eske sala ketsek, Memleket basshysy Qasym-Jomart Toqaev «Ulytaý – 2019» halyqaralyq týrıstik forýmynda Altyn ordanyń 750 jyldyǵyn toılaýdy usyndy.