Mádenıet jáne tarıhı-mádenı mura máseleleri zańmen jetildiriledi
ASTANA. QazAqparat - Búgin Májiliste mádenıet jáne tarıhı-mádenı mura máselelerine qatysty zań jobasy jumys tobynyń otyrysynda talqyǵa salyndy.
«Qazaqstan Respýblıkasynyń keıbir zańnamalyq aktilerine mádenıet jáne tarıhı-mádenı mura máseleleri boıynsha ózgerister men tolyqtyrýlar engizý týraly» zań jobasy Memleket basshysynyń 2014 jylǵy 4 qarashadaǵy Jarlyǵymen bekitilgen Qazaqstan Respýblıkasynyń mádenı saıasatynyń tujyrymdamasyna sáıkes ázirlengen.
Zań jobasy 2011 jylǵy 21 jeltoqsandaǵy Qazaqstan Respýblıkasynyń Zańymen ratıfıkatsııalanǵan materıaldyq emes mádenı murany qorǵaý týraly konventsııa negizinde materıaldyq emes mádenı murany qorǵaýǵa jáne Birikken Ulttar Uıymynyń qyzmetine Qazaqstannyń tolyqqandy qatysýyna yqpal etetin bolady.
Sondaı-aq zań jobasy atalǵan salanyń ınstıtýtsıonaldyq qaıta qurylýyn, basqarýshylyq sheshimderdiń úılestirilýin, qazirgi zamanǵa saı mádenı klasterlerdiń, salalyq kórkemdik keńesterdiń qurylýyn kózdeıtin Qazaqstan Respýblıkasynyń mádenı saıasatynyń tujyrymdamasyn iske asyrýǵa baǵyttalǵan.
Zań jobasynda bir kodekske jáne bes zańǵa túzetýler engizý kózdelgen.
Májilistiń Áleýmettik-mádenı damý komıtetiniń múshesi, jumys tobynyń jetekshisi, depýtat Kamal Burhanov bul zań jobasynyń bizdiń qoǵam úshin, onyń ishinde mádenıet jáne tarıhı-mádenı mura máselelerin rettýde mańyzdy ekenin alǵa tartty.
Jumys tobynyń músheleri zań jobasyn Salystyrma kestege engen baptar boıynsha jeke-jeke qarady. Búgingi kúnge deıin salystyrma kestege salalyq komıtetter men depýtattar usynǵan 60 túzetý engizilgen.
Jumys tobynyń otyrysyna qatysqan Májilis depýtattary Shalataı Myrzahmetov, Aldan Smaıyl, Orazgúl Asanǵazy, Gúlnár Seıitmaǵanbetova, Nurtaı Sabılıanov, Murat Ahmadıevter salystyrma kestege engizilgen túzetýlerdi sarapqa saldy. Depýtattardyń zań jobasyn talqylaýda belsendilik tanytty.
Jumys tobynyń kelesi otyrysy osy aptanyń beısenbi kúni jalǵasyn tabatyn boldy.
