Mádenıet jáne sport vıtse-mınıstri býkmekerlik salanyń múddesin qorǵady degen kúdikke ilindi

NUR-SULTAN. QazAqparat – QR Sybaılas jemqorlyqqa qarsy is-qımyl agenttiginde QR Mádenıet jáne sport vıtse-mınıstri Sáken Musaıbekovtiń ustalýyna qatysty túsinik berdi, dep habarlaıdy QazAqparat tilshisi.

«Mádenıet jáne sport vıtse-mınıstrine qatysty sotqa deıingi tergeý júrip jatyr. Ol býkmekerlik qyzmet salasy múddesine lobbıi men jalpy qamqorlyǵy úshin zańdy tulǵa quryltaıshysynan para alý kúdigine ilindi», - dedi QR Sybaılas jemqorlyqqa qarsy is-qımyl agenttiginiń asa mańyzdy ister jónindegi tergeýshisi Danııar Bekaıdarov brıfıng barysynda.

Onyń aıtýynsha, sot sanktsııasymen para alýshy men para bergen kúdikti qamaýǵa alyndy.

«Budan basqa aqparat tergeý múddesine baılanysty jarııalaýǵa jatpaıdy», - dedi Danııar Bekaıdarov.

Aıta keteıik, jaqynda birqatar buqaralyq aqparat quraldarynda Sáken Musaıbekovtiń ustalǵany týraly aqparat taraǵan bolatyn.

Eske salsaq, Sáken Júnisbekuly Musaıbekov 2020 jyly mamyrda QR Mádenıet jáne sport vıtse-mınıstri laýazymyna taǵaıyndaldy.