Mádenıet jáne sport salasynyń ókilderi sý tasqynynan zardap shekkenderge kómektesti

ASTANA. QazAqparat - Mádenıet jáne sport mınıstrligi men oǵan qarasty uıymdardyń ókilderi sý tasqynynan zardap shekkenderge qol ushyn sozý jónindegi ıgi iske úles qosty, dep habarlaıdy vedomstvonyń baspasóz qyzmeti.

Mádenıet jáne sport mınıstrligi #TaskynKomek kómek jınaý shtabymen birlese otyryp, Aqmola oblysynyń sýdan zardap shekken aýdandaryna 30 qap un men 20 qap kúrishtiń jetkizilýin uıymdastyrdy. Sonymen qatar «Nur Otan» partııasynyń «Mádenıet» bastaýysh partııa uıymynyń músheleri qarjy jınap, zardap shekkender qorynyń esebine 600 myń teńge aýdardy.

 

«Astana Opera» teatrynyń ujymy Qaraǵandy oblysynda sý tasqynynan zardap shekkenderge kómek kórsetý qoryna bir kúndik jalaqylaryn aýdardy. Teatrdyń kóptegen qyzmetkerleri «Jas Otan» jastar qanaty janyndaǵy Qoǵamdyq shtabqa qıyn jaǵdaıda qalǵan adamdarǵa taǵam ónimderi men kıim-keshek joldaý arqyly halyq aktsııasyna qoldaý bildirdi.