Mádenıet jáne sport mınıstrligin ekige bólý kerek pe - Aqtoty Raıymqulova jaýap berdi

NUR-SULTAN. QazAqparat - Mádenıet jáne sport mınıstrligin 2 vedomstvoǵa bólý qajet pe? Dál osy suraqqa búgin Ortalyq kommýnıkatsııalar qyzmeti alańynda QR Mádenıet jáne sport mınıstri Aqtoty Raıymqulova jaýap berdi, dep habarlaıdy QazAqparat tilshisi.

«Bizde mádenıettiń de, sporttyń da bar ekendigin maqtan tutamyn. Bul ánuranymyzdy oınatyp, týymyz kókke kóteretin salalar sanalady. Búgingi kúni mádenıet qaıratkerleri de, sport qaıratkerleri de Qazaqstannyń baı mádenıetiniń tamasha úlgilerin, sportshylarymyzdyń aıryqsha jetistikterin tanytý úshin eńbek etip júr. Sondyqtan qazirgi ýaqytta bul eki salanyń bir ókiletti organ quramynda bolǵany oryndy», - dedi mınıstr BAQ ókilderiniń saýalyna oraı.

Sonymen qatar ol qazaqstandyq sportshylar men ártister arasynda koronavırýs indetin juqtyrǵandar joq ekenin atap ótti.

«Mende mundaı aqparat joq. Sportshylarymyzdyń da, ártisterimizdiń de deni saý bolyp, óz qyzmetin odan ári jalǵastyra beredi dep senemin», - dedi Aqtoty Raıymqulova.