Mádenıet jáne sport mınıstri «Taqııaly perishteni» 80 jyldyq mereıtoıymen quttyqtady
Mınıstrdiń quttyqtaý hatynda: «Uly kınematograf Sháken Aımanovtyń jarty ǵasyrdan astam ýaqyt kórermenderdiń kózaıymyna aınalyp kele jatqan «Taqııaly perishte» fılmindegi bas keıipker - Taılaqtyń beınesin somdap, áli kúnge deıin ónersúıer qaýymnyń júregine jol taýyp kelesiz. «Bizde balalyq shaq bolmady» dep bir sózińizde aıtqandaı, namystan jaralǵan Siz eńbekke erte aralasyp, tynymsyz ǵumyr keshtińiz. Al, búginde Gúljaýhar apa ekeýińiz on bala ósirip, uldy uıaǵa, qyzdy qııaǵa qondyrdyńyz. Nemere-shóbere tárbıelep otyrsyzdar. Olardyń baqytty balalyq shaǵyna qamqor boldyńyzdar. Búginde eńbegińiz eleýsiz emes. Ómirdiń talaı ótkelderinen ótken ardaqty ardager, Almaty oblysynyń qurmetti azamaty jáne Qazaqstan Respýblıkasynyń Mádenıet qaıratkerisiz!» - delingen.
Mınıstr mereıtoı ıesine ǵumyrynyń uzaq, shańyraǵynda shattyqta bolýyna, órbigen urpaqtarynyń ortasynda asqar taýdaı bolyp júre berýine izgi nıetpen tilektestigin bildirdi.
Álimǵazy Smaǵululy Raıynbekov kásibı akter bolmaǵanymen, kógildir ekranda shyqqan 12 kınofılmde basty róldi somdaı bildi. 1965 jyly sporttyq sharalardyń birinde kózge túsip, «Án qanattary» fılmine túsýge shaqyrý alǵan kezde Álimǵazy aǵa sovhoz júrgizýshisi bolyp jumys istegen bolatyn.
1968 jyly ol Sháken Aımanovtyń «Taqııaly perishte» fılminde basty keıipker - Taılaqtyń rólinde oınady. Fılm kórermenderdiń kóńilinen shyǵyp, áli kúnge deıin qazaqstandyq kıno súıer qaýymnyń súıikti fılmderiniń biri bolyp keledi.
