Mádenıet jáne sport mınıstri mekteptegi dene shynyqtyrý sabaqtaryn kóbeıtýdi usynady
Mınıstrdiń aıtýynsha, sońǵy ýaqytta mektepter aıasynda sporttyq sektsııalar men klýbtar ashýǵa erekshe mán berilip keledi. Máselen, búgingi kúni mektepterde otyz myńnan astam sporttyq sektsııalar bar, onda jalpy oqýshylar sanynyń 27 paıyzy qamtylǵan.
«Alaıda, ásirese aýyldyq jerlerdegi mektepterde sport zaldarynyń, jabdyqtarynyń jetispeýshiliginen sport zaldary ashylmaı otyr. Buǵan qaramastan, balalar men jasóspirimder sportyn damytýǵa kúsh salyp kelemiz», dedi A. Muhamedıuly.
Mınıstrdiń aıtýynsha, damyǵan elderde, sonyń ishinde Ekonomıkalyq yntymaqtastyq jáne damý uıymy elderinde balalar men jasóspirimder sportyna erekshe mán beriledi.
«Osy elderge qarap, biz de jasóspirimder arasyndaǵy sportty damytýǵa erekshe mán berýimiz kerek. Atap aıtqanda, salalyq zańnama men normatıvter arqyly mektepterdegi dene shynyqtyrý saǵatyn úsh saǵatqa deıin jetkizý kerek. Elbasy eldi saýyqtyrýda eń aldymen Qazaqstannyń keleshegi bolyp tabylatyn balalar men jasóspirimdi saýyqtyrý kerektigin udaıy aıtyp keledi. Al qazirgi kúni aýyldaǵy sport zaldarynyń jetispeýshiligin sheshýdiń túrli joldary da bar», - dedi mınıstr A. Muhamedıuly.
