Mádenıet jáne sport mınıstri blogerlerdi «Qazaq handyǵynyń 550 jyldyǵy» mereıtoılyq medaldarymen marapattady

ASTANA. QazAqparat - Aıaqtalyp kele jatqan jyldy qorytyndylaı kele Qazaqstan Respýblıkasy mádenıet jáne sport mınıstri Arystanbek Muhamedıuly Qazaqstan blogerleri Alıansynyń prezıdenti Ǵalym Baıtúkke QR Mádenıet jáne sport mınıstrliginiń alǵyshaty men «Qazaq handyǵynyń 550 jyldyǵy» mereıtoılyq medalin tabystady.

2015 jyl Qazaq handyǵy qurylýynyń 550 jyldyǵyn atap ótýmen erekshelendi. Bul aıryqsha merekeni toılaýǵa elimizdiń barlyq azamattary qatysyp, respýblıka boıynsha 700-den astam túrli sharalar uıymdastyryldy. Bul sharalardy taratýmen otandyq jáne sheteldik BAQ aınalysty. Mereıtoılyq is-sharalardy nasıhattaý jumysyna áleýmettik jeliler qoldanýshylary da belsendi qatysty, dep habarlady Mádenıet jáne sport mınıstrliginiń baspasóz qyzmeti.

Blogerlermen kezdesý barysynda Arystanbek Muhamedıuly búgingi tańda áleýmettik jeliler beıresmı buqaralyq aqparat quraldarynyń rólin atqaryp jatqandyǵyna toqtalyp ketti. Olar túrli jańalyqtardy halyqtyń keń toptaryna qoljetimdi etip, olardy qarapaıym jáne barlyǵyna túsinikti etip jetkizedi.

«Qazaq handyǵynyń 550 jyldyǵyna arnalǵan sharalardy aıshyqtaýǵa qatysqan elimizdiń barlyq blogerlerine sheksiz alǵysymdy bildiremin. Jyl boıy blogerler jeke paraqshalarynyń betterinen búkil álemge ulttyq tarıhymyz, mádenıetimiz ben dástúrlerimiz týraly baıandaý jáne myńdaǵan jazylýshylarymen fotosýrettermen bólisý arqyly qoǵamda patrıottyq sezim men óz eli úshin maqtanysh sezimin uıalatýǵa atsalysty», - dedi mınıstrlik basshysy.

Sonymen qatar Janna Ilıcheva, Arshat Oraz, Arystanǵalı Sansyzbaev jáne Serik Mámbetov sekildi qazaqstandyq blogerler estelik mereıtoılyq medaldarmen marapattaldy.