Mádenıet jáne sport mınıstri Aqtaýdaǵy dzıýdo týrnırine bardy
AQTAÝ. QazAqparat - QR Mádenıet jáne sport mınıstri Arystanbek Muhamedıuly Mańǵystaý oblysyna jasaǵan jumys sapary barysynda dzıýdodan 2001-2006 jyldary týǵan jasóspirimder arasyndaǵy oblystyq chempıonattyń qurmetti qonaǵy boldy, dep habarlaıdy «QazAqparat» HAA tilshisi.
Mınıstr osy saparynda «Jas batyr» oblystyq mamandandyrylǵan balalar men jasóspirimder sport mektebiniń tárbıelenýshilerimen kezdesti. «Bul mektepte maqsaty aıqyn daryndy sportshylardyń ósip kele jatqany qýantady. Mektep basshylyǵy tek Aqtaý jastaryn tárbıeleýmen ǵana shektelmeı, aýyldardaǵy sport klýbtarynda shynyǵyp jatqan sportshylarmen de yntymaqtastyq jasap, Memleket basshysy Nursultan Nazarbaevtyń kóregen saıasatyn júzege asyryp otyrǵany óte mańyzdy. Jaqynda ǵana osy mekteptiń tárbıelenýshisi Ramazan Mamaev Serbııanyń Novı-Sad qalasyndaǵy halyqaralyq týrnırde búkil qarsylastaryn birinen soń birin jeńip, sambodan tuńǵysh mańǵystaýlyq álem chempıony boldy. Ol sońǵy jeti jyldan álemdik týrnırde Qazaqstan alǵan birinshi altyn medal boldy», - dedi Qazaqstan Respýblıkasynyń mádenıet jáne sport mınıstri Arystanbek Muhamedıuly.
